തിരുവനന്തപുരം: എസ്.എസ്.എൽ.സി, പ്ലസ് ടൂ പരീക്ഷ എഴുതുന്ന വിദ്യാർത്ഥികൾക്ക് അവർ പഠിക്കുന്ന ജില്ലയ്ക്ക് പുറത്തും പരീക്ഷ എഴുതാമെന്ന് സർക്കാർ. ഇതോടെ നിലവിൽ പഠിക്കുന്ന ജില്ലയ്ക്ക് പുറത്ത് കഴിയുന്ന വിദ്യാർത്ഥികൾക്ക് അവിടെനിന്ന് തന്നെ പരീക്ഷ എഴുതാൻ സാധിക്കും. എന്നാൽ ജില്ലകൾക്കകത്ത് മാറ്റം അനുവദിക്കില്ല.

പരീക്ഷാ കേന്ദ്രം മാറ്റാനായി വിദ്യാർത്ഥികൾ ഓൺലൈനായി അപേക്ഷ നൽകണം. sslcexam.kerala.gov.in, hscap.kerala.gov.in,എന്നീ വെബ്സൈറ്റുകളിലൂടെയാണ് അപേക്ഷിക്കേണ്ടത്. 23ന് പരീക്ഷാ കേന്ദ്രം അനുവദിച്ച് ലിസ്റ്റ് പ്രസിദ്ധീകരിക്കും. പ്ലസ് ടു, വി.എച്ച്‍.എസ്‍.സി കുട്ടികൾ അവരുടെ സബ്‍ജക്ട് കോംബിനേഷൻ ഉള്ള സ്കൂളിൽ മാത്രമേ അപേക്ഷിക്കാവു.

മേയ് 26 നാണ് എസ്എസ്‍എൽസി പ്ലസ് ടു പരീക്ഷൾ ആരംഭിക്കുന്നത്. ഈ മാസം 31 വരെ ലോക്ക് ഡൗൺ പ്രഖ്യാപിച്ച സാഹചര്യത്തിൽ 26 മുതൽ നിശ്ചയിച്ചിരുന്ന പരീക്ഷകൾ മാറ്റണമെന്നായിരുന്നു വിദ്യാഭ്യാസ വകുപ്പിന്‍റെ നിര്‍ദേശം. എന്നാൽ പരീക്ഷ മുൻ നിശ്ചയിച്ച പ്രകാരം നടത്താനായിരുന്നു മുഖ്യമന്ത്രിയുടെ തീരുമാനം. ലോക്ക് ഡൗൺ കഴിയുന്നത് വരെ പരീക്ഷ മാറ്റിവയ്ക്കണമെന്ന പ്രതിപക്ഷത്തിന്റെ ആവശ്യവും മുഖ്യമന്ത്രി തള്ളിയിരുന്നു.