തിരുവനന്തപുരം : പത്തുവയസിനു താഴെയുള്ളവരും 65 വയസിന് മുകളിലുള്ളവരും പൊതുസ്ഥലങ്ങളിലും കടകളിലും മറ്റും സന്ദർശനം നടത്തുന്നത് ലോക്ഡൗൺ മാനദണ്ഡങ്ങൾക്ക് വിരുദ്ധമാണെന്ന് ഡി.ജി.പി ലോക്നാഥ് ബെഹ്റ. ഇങ്ങനെ എത്തുന്നവരെ നിരുത്സാഹപ്പെടുത്താൻ കടയുടമകള്‍ തന്നെ മുന്നോട്ട് വരണം. ഇക്കാര്യത്തിൽ സഹായവും ബോധവത്കരണവും നടത്തുന്നതിന് ജനമൈത്രി പൊലീസ് സഹായിക്കുമെന്നും അദ്ദേഹം പറഞ്ഞു.

ജില്ലയ്ക്കകത്ത് കെ.എസ്.ആർ.ടി.സി സർവീസുകൾ ആരംഭിച്ച സാഹചര്യത്തിൽ യാത്രക്കാർ സാമൂഹിക അകലം ഉൾപ്പെടെയുള്ള മാനദണ്ഡങ്ങൾ പാലിക്കുന്നുവെന്ന് ഉറപ്പാക്കാൻ ജില്ലാ പൊലീസ് മേധാവിമാർക്ക് നിർദ്ദേശം നല്‍കി. ബസിൽ കയറാൻ ജനങ്ങൾ തിരക്ക് കൂട്ടുന്നത് ഒഴിവാക്കാനും പൊലീസ് നടപടി സ്വീകരിക്കും.

വീടുകളിലും സ്ഥാപനങ്ങളിലും ക്വാറന്റൈനിൽ കഴിയുന്നവർ നിർദ്ദേശങ്ങൾ ലംഘിക്കുന്നത് കണ്ടെത്താൻ രൂപീകരിച്ച മോട്ടോർ സൈക്കിൾ ബ്രിഗേഡ് സംവിധാനം കൂടുതൽ സ്ഥലങ്ങളിലേക്ക് വ്യാപിപ്പിക്കും. ഇത്തരം പരിശോധനകൾക്കായി ജില്ലയിൽ കുറഞ്ഞത് 25 സംഘങ്ങളെ വീതം നിയോഗിക്കാൻ ജില്ലാ പൊലീസ് മേധാവിമാർക്ക് നിർദ്ദേശം നൽകി. ക്വാറന്റൈൻ ലംഘനം കണ്ടെത്തുക, ക്വാറന്റൈൻ കേന്ദ്രങ്ങൾ സന്ദർശിക്കു, തനിച്ചു കഴിയുന്ന മുതിർന്ന പൗരൻമാരെ സന്ദർശിച്ച്‌ ക്ഷേമം അന്വേഷിക്കുക എന്നിവയാണ് മോട്ടോർ സൈക്കിൾ ബ്രിഗേഡിന്റെ പ്രധാന ചുമതല. പദ്ധതിയുടെ സംസ്ഥാനതല ഏകോപനത്തിന്റെ ചുമതല ദക്ഷിണ മേഖല ഐ.ജി ഹർഷിത അട്ടല്ലൂരിക്കാണ്.