മിഷിഗൻ: ലോകത്ത് കൊവിഡ് ബാധ ഏറ്രവുമധികം മാരകമായി മാറിയ അമേരിക്കയിൽ സുരക്ഷാ നിർദ്ദേശങ്ങളും ടെസ്റ്റുകളുമെല്ലാം കർശനമായി നടക്കാറുണ്ട്. എന്നാൽ പ്രസിഡന്റ് ഡൊണാൾഡ് ട്രംപ് ഒരിക്കൽ പോലും സുരക്ഷാ മുൻകരുതലായി മാസ്ക് ധരിച്ചിട്ടില്ല. കഴിഞ്ഞ ദിവസം മിഷിഗനിലെ ഫോർഡ് വാഹന കമ്പനിയുടെ പ്ളാന്റ് സന്ദർശിച്ച ട്രംപും ഒപ്പമുള്ള ഉദ്യോഗസ്ഥരും സുരക്ഷാ മാസ്ക് ധരിച്ചിരുന്നില്ല.

നാട്ടിൽ രോഗബാധ തീവ്രമായ ശേഷം ഫാക്ടറിയിൽ വരുന്നവർ മുഖാവരണം ധരിച്ചിരിക്കണം എന്ന് ഫോർഡ് കമ്പനിയിൽ നിയമമുണ്ട്. എന്നാൽ ട്രംപിനോട് മാസ്ക് ധരിക്കുന്നതിനെ കുറിച്ച് ഓർമ്മിപ്പിച്ചെങ്കിലും അദ്ദേഹം അതിന് തയ്യാറായില്ലെന്ന് ഫോർഡ് ചെയർമാൻ ബിൽ ഫോർഡ് അറിയിച്ചു. തനിക്കും ഒപ്പമുള്ള ഉന്നത ഉദ്രോഗസ്ഥർക്കും ദിവസവും കൊവിഡ് പരിശോധനകളും സുരക്ഷയുമുണ്ടെന്ന വിചിത്ര വാദമാണ് ട്രംപ് മാസ്ക് ധരിക്കാത്തതിനെ കുറിച്ച് ചോദിച്ച മാദ്ധ്യമപ്രവർത്തകരോട് മറുപടിയായി നൽകിയത്.

മാത്രമല്ല പ്ളാന്റിനുള്ളിൽ താൻ മാസ്ക് ധരിച്ചെന്നും അദ്ദേഹം വാദിച്ചു. എന്നാൽ മാസ്ക് വയ്ക്കാതെ ഫോർഡ് കമ്പനി പ്രതിനിധികളുമായി സംസാരിക്കുന്ന ട്രംപിന്റെ ചിത്രം പുറത്തുവന്നിട്ടുണ്ട്. അമേരിക്കയിലെ രോഗ പ്രതിരോധ നിയന്ത്രണ വകുപ്പ് എല്ലാവരും മാസ്ക് ധരിക്കണമെന്ന് ഔദ്യോഗിക ഉത്തരവ് പുറത്തിറക്കിയിരിക്കുമ്പോൾ തന്നെയാണ് പ്രസിഡന്റും മറ്റ് ഉദ്യോഗസ്ഥരും നിരന്തരം ഇതൊന്നും അനുസരിക്കാതെയിരിക്കുന്നത്.