പ്യോങ് യാങ്:- രാജ്യത്തെ കേന്ദ്ര സൈനിക കമ്മിഷൻ അംഗങ്ങളുടെ യോഗം വിളിച്ച് ഉത്തര കൊറിയൻ ഏകാധിപതി കിം ജോങ് ഉൻ.യോഗത്തിൽ പങ്കെടുക്കാനെത്തിയ കിമ്മിനെ മാസ്കുകൾ ധരിച്ചാണ് ഉദ്യോഗസ്ഥർ സ്വീകരിച്ചത്. എന്നാൽ മീറ്രിംഗ് തുടങ്ങിയപ്പോൾ ഇവരും കിമ്മിനെ പോലെ മാസ്ക് ധരിച്ചില്ല. രാജ്യത്തിന്റെ ആണവയുദ്ധ പ്രതിരോധ സംവിധാനം വർദ്ധിപ്പിക്കുന്നതിനും സായുധസേനയുടെ ആയുധസംഹാര ശേഷി ഉയർത്തുന്നതിനുമുള്ള യോഗമായിരുന്നു ഇത്.

ഉത്തരകൊറിയയുടെ മിസൈൽ പദ്ധതികളും ആണവായുധ പരീക്ഷണങ്ങളും അവസാനിപ്പിച്ച് ആണവ നിരായുധീകരണം ലക്ഷ്യമിട്ടുള്ള ഉത്തര കൊറിയ-അമേരിക്ക ചർച്ചകൾ കുറച്ച് നാളുകളായി നേരിയ പുരോഗതി മാത്രമാണുള്ളത്. ഇവർ തമ്മിൽ ചർച്ച പുനരാരംഭിക്കുമെന്നാണ് ചൈനയുടെ പ്രതീക്ഷ. അമേരിക്ക 1992ന് ശേഷം അണുശക്തി പരീക്ഷണത്തെ കുറിച്ച് ആലോചിക്കുന്ന ഈ സമയം തന്നെ കിം ഉന്നതതല യോഗം ചേർന്നതിനെ ആശങ്കയോടെയാണ് ലോകം വീക്ഷിക്കുന്നത്.

അതേ സമയം ഉത്തരകൊറിയയിൽ കൊവിഡ് രോഗബാധയെ കുറിച്ച് വിവരങ്ങൾ ലഭിക്കാത്തത് സംശയം ജനിപ്പിക്കുന്നതാണ്. മറ്റ് രാജ്യങ്ങളിൽ കൊവിഡ് പിടിമുറുക്കുമ്പോഴും തങ്ങളുടെ രാജ്യത്ത് കൊവിഡ് ബാധയില്ലെന്നാണ് ഉത്തരകൊറിയയുടെ ഇപ്പോഴും തുടരുന്ന വാദം. എന്നാൽ അത് തെറ്റാകാമെന്നാണ് ദക്ഷിണ കൊറിയയുടെ ആരോപണം.