തിരുവനന്തപുരം: തിരഞ്ഞെടുപ്പ് അടുത്തതോടെ എൽ.ഡി.എഫിന് വേവലാതിയാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. സ്വന്തം ശക്തിയിൽ സംശയമുള്ളതിനാലാണ് അവർക്ക് യു.ഡി.എഫിൽ നിന്ന് ആരെയെങ്കിലും കിട്ടിയാൽ കൊള്ളാമെന്നുള്ള ധാരണ ഉണ്ടായിരിക്കുന്നത്. . ഇപ്പോഴത്തെ സാഹചര്യത്തിൽ എൽ.ഡി.എഫ് തിരഞ്ഞെടുപ്പിനെ നേരിട്ടാൽ പാർലമെന്റ് തിരഞ്ഞെടുപ്പിന്റെ അനുഭവം ഉണ്ടാകുമെന്ന് ബോദ്ധ്യമുള്ളതിനാലാണ് മറ്റ് കക്ഷികളെ അടർത്തിയെടുക്കാൻ നോക്കുന്നത്. ആ വെള്ളം അവർ വാങ്ങിവച്ചാൽ മതി. യു.ഡി.എഫിൽ നിന്ന് ഒരു കക്ഷികളും പോകില്ല. എല്ലാ കക്ഷികളും പരസ്‌പര വിശ്വാസത്തോടെ,​ ഒറ്റക്കെട്ടായി മുന്നോട്ട് പോകും. മുന്നണിയിൽ ഒരു തരത്തിലുള്ള ആശങ്കയുമില്ല,​ മറിച്ച് ആത്മവിശ്വാസമേയുള്ളൂ.എന്തെല്ലാം പ്രചാരവേലകൾ നടത്തിയാലും എൽ.ഡി.എഫിന് ക്ളച്ച് പിടിക്കാനാകില്ലെന്നും ചെന്നിത്തല മാദ്ധ്യമങ്ങളോട് പറഞ്ഞു.