തിരുവനന്തപുരം : സംസ്ഥാന സർക്കാറിന്റെ കൊവിഡ് സാമ്പത്തിക പാക്കേജിന്റെ ഭാഗമായി ബി.പി.എൽ ,അന്ത്യോദയ കാർഡ് ഉടമകൾക്കുള്ള ധനസഹായ വിതരണം ചൊവ്വാഴ്ച മുതൽ ആരംഭിക്കും. ക്ഷേമപെൻഷനുൾപ്പെടെ ഒരു ധനസഹായവും ലഭിക്കാത്ത കാർഡ് ഉടമകൾക്ക് 1000 രൂപ വീതമാണ് നൽകുക. ജൂൺ ആറു വരെയാണ് വിതരണം. സഹകരണ ബേങ്ക് ജീവനക്കാർ അർഹരുടെ വീടുകളിൽ തുക നേരിട്ട് എത്തിക്കും.

മുഖ്യമന്ത്രിയുടെ ദുരിതാശ്വാസ നിധിയിൽ നിന്നാണ് ധനസഹായം അനുവദിക്കുന്നത്. 14,78,236 കുടുംബങ്ങളാണ് അർഹരുടെ പട്ടികയിൽ ഇടംപിടിച്ചിരിക്കുന്നത്. തദ്ദേശ സ്വയംഭരണ സ്ഥാപനങ്ങളിലും റേഷൻ കടകളിലും സഹകരണ ബേങ്കുകളിലും ഗുണഭോക്താക്കളുടെ പട്ടിക ലഭിക്കും. മ​റ്റു ആനുകൂല്യങ്ങളൊന്നും കൈപ്പ​റ്റിയിട്ടില്ല എന്ന സത്യവാങ്മൂലം തുക കൈപ്പ​റ്റുമ്പോൾ നൽകണം. റേഷൻ കാർഡിലെ ഗൃഹനാഥയ്ക്കാണ് സഹായത്തിന് അർഹതയുള്ളത്.

അതേസമയം, മരണശേഷവും ഗൃഹനാഥയുടെ പേര് റേഷൻ കാർഡിൽ നിന്ന് നീക്കം ചെയ്യാത്ത ചില കേസുകൾ ശ്രദ്ധയിൽപ്പെട്ടിട്ടുണ്ട്. അർഹതയുടെ മ​റ്റു മാനദണ്ഡങ്ങൾ ബോധ്യപ്പെടുന്ന പക്ഷം റേഷൻ കാർഡിൽ പേരുള്ള മ​റ്റൊരു മുതിർന്ന കുടുംബാംഗത്തിന് സത്യവാങ്മൂലം നൽകി പണം വാങ്ങാം.