വാഷിംഗ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ട്വീറ്റിന് 'ഫാക്ട് ചെക്ക്" മുന്നറിയിപ്പ് നൽകി ട്വിറ്റർ. ആദ്യമായാണ് യു.എസ് പ്രസിഡന്റിന്റെ ട്വീറ്റിന് വസ്തുതാ പരിശോധന മുന്നറിയിപ്പുമായി ട്വിറ്റർ രംഗത്തെത്തുന്നത്. പോസ്റ്റൽ വോട്ട് സംബന്ധിച്ച ട്രംപിന്റെ ട്വീറ്റുകൾക്കാണ് ട്വിറ്റർ മുന്നറിയിപ്പ് നൽകിയത്.

തിരഞ്ഞെടുപ്പിൽ വളരെ പ്രസക്തമായ പോസ്റ്റൽ വോട്ട് രീതിയെ വഞ്ചനയെന്നാണ് പ്രസിഡന്റ് ട്വീറ്റ് ചെയ്തിരിക്കുന്നത്. മെയിൽ ഇൻ ബാലറ്റുകൾ കവർച്ച ചെയ്യപ്പെടുമെന്നും വഞ്ചിക്കപ്പെടുമെന്നുമാണ് വിവാദ ട്വീറ്റിന്റെ വരികൾ. ട്വീറ്റ് പ്രത്യക്ഷപ്പെട്ടതോടെ ട്രംപിന്റെ പ്രസ്താവനകൾ തെറ്റിദ്ധരിപ്പിക്കപ്പെടുന്നതാണെന്ന് ട്വിറ്റർ നിലപാടെടുത്തു ട്രംപിന്റെ ട്വീറ്റുകൾക്ക് താഴെ മെയിൽ ഇൻ ബാലറ്റുകളെ സംബന്ധിച്ച വസ്തുതകൾ അറിയാനുള്ള ലിങ്കും ട്വിറ്റർ നൽകി. ഈ ലിങ്ക് തുറക്കുമ്പോൾ ട്രംപിന്റെ അവകാശവാദങ്ങളെ കുറിച്ചുള്ള ഫാക്ട് ചെക്ക് വിവരങ്ങൾ ലഭ്യമാകും.

എന്നാൽ തിരഞ്ഞെടുപ്പ് സംബന്ധിച്ച ഇത്തരം പ്രചാരണങ്ങൾ ട്വിറ്റർ വിലക്കുന്നത് പതിവാണ്. എന്നാൽ ആദ്യമായാണ് പ്രസിഡന്റിന്റെ ട്വീറ്റിന് ഈ മുന്നറിയിപ്പ് ലഭിക്കുന്നത്.

അനുവദിക്കാനാവില്ല: ട്രംപ്

ട്വിറ്റർ,​ പ്രസിഡന്റ് തിരഞ്ഞെടുപ്പിൽ ഇടപെടുന്നുണ്ടെന്നും ഇതിന് അനുവദിക്കില്ലെന്നും ഡൊണാൾഡ് ട്രംപ് പ്രതികരിച്ചു. എന്തായാലും വിഷയം തിരഞ്ഞെടുപ്പിലും ഉന്നയിക്കപ്പെടുമെന്നത് വ്യക്തമാണ്. കൊവിഡ് നിയന്ത്രണാതീതമായി രാജ്യത്തെ പിടിച്ചുലയ്ക്കുന്നതിൽ ട്രംപിനെതിരെ വൻ വിമർശനമാണ് ഉയരുന്നത്. രോഗം നിയന്ത്രിക്കാനാവാത്തത് ട്രംപിന്റെ നില പരുങ്ങലിലാക്കി കഴിഞ്ഞു.