പാട്​ന: അമ്മ മരിച്ചതറിയാതെ മൃതദേഹം മൂടിയ തുണി പിടിച്ച്​ വലിച്ച്​ എഴുന്നേൽപ്പിക്കാൻ ശ്രമിക്കുന്ന പിഞ്ചുകുഞ്ഞിന്റെ രൂപം ആരുടെയും കരളുരുക്കുന്നതായിരുന്നു. ബിഹാറിലെ മുസഫർപൂർ റെയിൽവേ സ്​റ്റേഷനിലാണ്​ നെഞ്ചുപിളർക്കുന്ന കാഴ്​ച. സമൂഹ മാദ്ധ്യമങ്ങളിൽ ദൃശ്യം പ്രചരിച്ചതോടെയാണ്​ ഇത്​ പുറംലോകമറിഞ്ഞത്​.

കടുത്ത ചൂടും വിശപ്പും ദാഹവും സഹിക്കാനാവാതെയാണ്​ ആ അമ്മ മരണത്തെ പുൽകിയത്​. തിങ്കളാഴ്​ചയാണ്​ പ്രത്യേക ട്രെയിനിൽ 23കാരിയായ അമ്മയും കുഞ്ഞും ഈ സ്​റ്റേഷനിലെത്തിയത്​. യാത്രയിൽ അമ്മയ്ക്കും കുഞ്ഞിനും ഭക്ഷണവും വെള്ളവും ലഭിച്ചില്ലെന്നാണ്​ റിപ്പോർട്ട്​. ഞായറാഴ്​ചയാണ്​ ഗുജറാത്തിൽ നിന്ന്​ അവർ ട്രെയിനിൽ കയറിയത്​. തിങ്കളാഴ്​ച മുസഫർപൂരിലെത്തിയതോടെ കുഴഞ്ഞുവീഴുകയായിരുന്നു. ആരൊക്കെയോ ചേർന്ന്​ മൃതദേഹം പ്ലാറ്റ്​ഫോമിലേക്ക്​ കിടത്തി. ഒരു തുണികൊണ്ട്​ മൂടി. അവരുടെ കുഞ്ഞുമകൻ അപ്പോഴും അരികിലിരുന്ന്​ കളിക്കുകയായിരുന്നു. വിശന്നപ്പോൾ അവൻ അമ്മയെ ഉണർത്താൻ ശ്രമിച്ചു. ഉറക്കെ കരഞ്ഞു. പക്ഷേ, അമ്മ ഉണർന്നില്ല. ഒടുവിൽ ഒരാൾ കുട്ടിയെ മൃതദേഹത്തിനടുത്ത് നിന്ന് മാറ്റുന്നത് വരെ അവൻ അമ്മേ എഴുന്നേൽക്കൂ എന്ന് വിലപിച്ചുകൊണ്ടിരുന്നു.

സഹോദരിക്കും ഭർത്താവിനും മക്കൾക്കുമൊപ്പം കൈതാറിലേക്കാണ്​ ഇവർ യാത്ര ചെയ്​തിരുന്നത്​.

ദിവസങ്ങൾക്കു മുമ്പും ഇതേ സ്​റ്റേഷനിൽ രണ്ടുവയസുള്ള കുഞ്ഞ്​ ഭക്ഷണവും വെള്ളവും കിട്ടാതെ കൊടുംചൂട്​ അതിജീവിക്കാനാവാതെ മരിച്ചിരുന്നു. ഞായറാഴ്​ചയാണ്​ ആ കുട്ടിയുടെ കുടുംബം സ്​റ്റേഷനിൽ വന്നിറങ്ങിയത്​. ലോക്ക്​ഡൗൺ പ്രഖ്യാപിച്ചതോടെ ഇത്തരത്തിൽ നിരവധി അന്തർസംസ്​ഥാന തൊഴിലാളികളാണ്​ ദാരുണമായി മരിക്കുന്നത്.