കറാച്ചി: പാകിസ്ഥാനിൽ കഴിഞ്ഞദിവസം തകർന്നുവീണ യാത്രാവിമാനത്തിന്റെ അവശിഷ്ടങ്ങൾക്കിടയിൽ നിന്ന് 3 കോടി രൂപ കണ്ടെടുത്തതായി അധികൃതർ. 99 യാത്രക്കാർ സഞ്ചരിച്ച വിമാനത്തിൽ 9 കുട്ടികൾ ഉൾപ്പെടെ 97 പേരാണ് അപകടത്തെ തുടർന്ന് കൊല്ലപ്പെട്ടത്. 91 പേർ യാത്രക്കാരും എട്ടുപേർ ജീവനക്കാരും ആയിരുന്നു. കറാച്ചി അന്താരാഷ്ട്ര വിമാനത്താവളത്തിനടുത്തുള്ള ജനവാസകേന്ദ്രത്തിൽ ലാഹോറിൽ നിന്നും കറാച്ചിയിലേക്ക് പോകുകയായിരുന്ന പികെ-8303 എന്ന വിമാനമാണ് തകർന്നുവീണത്. 2 പേർ അത്ഭുതകരമായി രക്ഷപ്പെട്ടിരുന്നു.

തകർന്ന വിമാനത്തിൽ ഉണ്ടായിരുന്ന രണ്ട് ബാഗുകളിൽ നിന്നാണ് വിവിധ രാജ്യങ്ങളിലെ കറൻസികൾ ഉൾപ്പടെ 3 കോടി വിലമതിക്കുന്ന മൂല്യശേഖരം കണ്ടെത്തിയത്. ഇത്രയധികം രൂപ എങ്ങനെയാണ് വിമാനത്താവളത്തിലെ സുരക്ഷാ ക്രമീകരണങ്ങൾക്കിടയിലൂടെ വിമാനത്തിലെത്തിയതെന്ന് അന്വേഷിക്കാനായി ഉത്തരവിട്ടിട്ടുണ്ടെന്ന് അധികൃതർ പറഞ്ഞു. അതേസമയം,​ മൃതദേഹങ്ങളും ലഗേജുകളും തിരിച്ചറിഞ്ഞ് അവരവരുടെ കുടുംബാംഗങ്ങൾക്കും ബന്ധുക്കൾക്കും വിട്ടുനൽകാനുള്ള നടപടിക്രമങ്ങൾ പുരോഗമിക്കുകയാണെന്ന് ഉദ്യോഗസ്ഥർ അറിയിച്ചു. 47 പേരുടെ മൃതദേഹം തിരിച്ചറിഞ്ഞതായും ബാക്കി 43 മൃതദേഹങ്ങൾ സംസ്‌കരിക്കാനായി വിട്ടുനൽകിയതായും ഉദ്യോഗസ്ഥർ പറഞ്ഞു.