പ്രായം എന്നത് വെറുമൊരു സംഖ്യമാത്രമാണെന്നാണ് ഇപ്പോൾ സ്ത്രീകളുടെ കാഴ്ചപ്പാട്. അത് കൊണ്ടുതന്നെ അവരുടെ ആഗ്രഹങ്ങളുടെ ആകാശത്തിന് പ്രായം ഒരു തടസമേയല്ല. ആ പോളിസി ശരിവെക്കുന്ന പ്രകടനം കാഴ്ചവെക്കുകയാണ് ഒരു മുത്തശ്ശി. ഊഞ്ഞാലിൽ ഇരുന്നും നിന്നും സ്വയംമറന്നാടുന്ന മുത്തശ്ശി ഇപ്പോൾ സോഷ്യൽ മീഡിയയിൽ വൈറലാണ്.
ആന്ധ്രാപ്രദേശില്‍ നിന്നുള്ള എഴുപത്തിയാറുകാരിയായ ജയ എന്ന മുത്തശ്ശിയാണ് വീഡിയോയിലെ താരം. നന്നായി ആസ്വദിച്ചാണ് മുത്തശ്ശി ഊഞ്ഞാലാടുന്നത് എന്നാണ് ആളുകളുടെ കമന്‍റ് . ആട്ടത്തിനൊപ്പം വേഗത കൂടുന്നതൊന്നും മുത്തശ്ശി ശ്രദ്ധിക്കുന്നതേയില്ല. പവന്‍ എന്ന ട്വിറ്റര്‍ അക്കൗണ്ടില്‍ നിന്നാണ് ഈ വീഡിയോ പ്രചരിക്കുന്നത്. വീഡിയോയ്ക്കൊപ്പം ' എഴുപത്തിയാറ് വയസ്സു പ്രായമുള്ള ആന്ധ്രാപ്രദേശിലെ അനന്തപൂര്‍ ജില്ലയില്‍ നിന്നുള്ള ജയ ആണിത്. കൊച്ചുമക്കളെപ്പോലെ തന്നെ ജീവിതത്തെ ആസ്വദിക്കുകയാണിവര്‍. ചിലരെ സംബന്ധിച്ചിടത്തോളം പ്രായം വെറും ജൈവശാസ്ത്രപരമാണ്, ഹൃദയത്തില്‍ അവര്‍ എന്നും ചെറുപ്പം കാത്തുസൂക്ഷിക്കുന്നു'- പവന്‍ കുറിച്ചു. നിരവധി പേർ ഈ വീഡിയോ കാണുകയും ഷെയർ ചെയ്യുകയും ചെയ്തിട്ടുണ്ട്..