മലപ്പുറം: ജില്ലയിൽ അഞ്ചുപേർക്ക് കൂടി ഇന്നലെ കൊവിഡ് -19 സ്ഥിരീകരിച്ചു.മേയ് 22ന് ദുബായിൽ നിന്ന് കരിപ്പൂരിലെത്തിയ കുറ്റിപ്പുറം നടുവട്ടം രാങ്ങാട്ടൂർ സ്വദേശി 23 കാരൻ, മേയ് 19ന് റിയാദിൽ നിന്ന് കരിപ്പൂരിലെത്തിയവരായ തിരൂരങ്ങാടി മമ്പുറം സ്വദേശി 49 കാരൻ, എടക്കര മൂത്തേടം സ്വദേശി 36കാരൻ, മെയ് 17ന് അബുദാബിയിൽ നിന്ന് കരിപ്പൂർ വഴി തിരിച്ചെത്തിയ എടവണ്ണ പത്തപ്പിരിയം ചെരങ്ങാട്ടുപൊയിൽ സ്വദേശി 25 കാരൻ, ബംഗളൂരുവിൽ നിന്ന് മേയ് 14ന് നാട്ടിലെത്തിയ ഒഴൂർ ഓമച്ചപ്പുഴ സ്വദേശി 52 കാരൻ എന്നിവർക്കാണ് രോഗബാധയെന്ന് എ.ഡി.എം. എൻ.എം. മെഹറലി അറിയിച്ചു. ഇവർക്കു പുറമെ മേയ് 26ന് കുവൈത്തിൽ നിന്നുള്ള പ്രത്യേക വിമാനത്തിൽ കരിപ്പൂരിലെത്തിയവരായ ഇടുക്കി മൂന്നാർ സൂര്യനെല്ലി ബി.എൽ റാം സ്വദേശി 28 കാരൻ, തൃശൂർ കൈപ്പമംഗലം 19 സ്വദേശി 32 കാരൻ, തിരുവനന്തപുരം കഠിനംകുളം പുത്തൻതോപ്പ് സ്വദേശി 40 കാരൻ, മേയ് 26 ന് അബുദാബിയിൽ നിന്ന് പ്രത്യേക വിമാനത്തിൽ കരിപ്പൂരിലെത്തിയ പാലക്കാട് പട്ടാമ്പി തിരുമിറ്റക്കോട് നെല്ലിക്കാട്ടിരി സ്വദേശി 22 കാരൻ എന്നിവർക്കും രാമനാട്ടുകര വൈദ്യരങ്ങാടി പുല്ലുംകുന്ന് റോഡിൽ താമസിക്കുന്ന എയർ ഇന്ത്യ ജീവനക്കാരിയായ പൂനെ സ്വദേശിനി 24കാരിക്കും വൈറസ്ബാധ സ്ഥിരീകരിച്ചിട്ടുണ്ട്. ഇവരും മഞ്ചേരി മെഡിക്കൽ കോളജ് ആശുപത്രിയിൽ ഐസൊലേഷനിലാണ്.

രോഗം സ്ഥിരീകരിച്ചവരുമായി ഏതെങ്കിലും വിധത്തിൽ സമ്പർക്കമുണ്ടായവർ വീടുകളിൽ പൊതു സമ്പർക്കമില്ലാതെ പ്രത്യേക മുറികളിൽ നിരീക്ഷണത്തിൽ കഴിയണമെന്ന് ജില്ലാ മെഡിക്കൽ ഓഫീസർ ഡോ. കെ. സക്കീന അറിയിച്ചു. ഈ വിവരം ആരോഗ്യ പ്രവർത്തകരെ അറിയിക്കണം. വീടുകളിൽ നിരീക്ഷണത്തിന് സൗകര്യമില്ലാത്തവർക്ക് സർക്കാർ ഒരുക്കിയ കൊവിഡ് കെയർ സെന്ററുകൾ ഉപയോഗപ്പെടുത്താം. ആരോഗ്യ പ്രശ്നങ്ങളുണ്ടായാൽ ഒരു കാരണവശാലും നേരിട്ട് ആശുപത്രികളിൽ പോകരുത്. ജില്ലാതല കൺട്രോൾ സെല്ലിൽ വിളിച്ച് ലഭിക്കുന്ന നിർദ്ദേശങ്ങൾ പൂർണമായും പാലിക്കണം. ജില്ലാതല കൺട്രോൾ സെൽ നമ്പറുകൾ: 0483 2737858, 2737857, 2733251, 2733252, 2733253.