പാലക്കാട്: അന്യസംസ്ഥാന തൊഴിലാളി ഉൾപ്പെടെ ഏഴുപേർക്ക് ഇന്നലെ കൊവിഡ് സ്ഥിരീകരിച്ചു. ഇതോടെ ജില്ലയിലെ രോഗബാധിതരുടെ എണ്ണം 89 ആയി. രോഗം സ്ഥിരീകരിച്ചവരിൽ മലമ്പുഴ സ്വദേശിയായ ഒരു വനിതയും ഉൾപ്പെടുന്നു. 13ന് ചെന്നൈയിൽ നിന്നുവന്ന് 24ന് രോഗം സ്ഥിരീകരിച്ച വ്യക്തിയുടെ അമ്മയാണിവർ.

രോഗം സ്ഥിരീകരിച്ച ആസാമിൽ നിന്നുള്ള അന്യസംസ്ഥാന തൊഴിലാളി (28) കഞ്ചിക്കോട് ഒരു ഹോട്ടലിൽ ജോലി ചെയ്യുകയാണ്. 13ന് നാട്ടിലെത്തിയ മുണ്ടൂർ സ്വദേശി (47), 11ന് ഹൈദരാബാദിൽ നിന്നെത്തിയ കടമ്പഴിപ്പുറം സ്വദേശി (34), 20ന് ചെന്നൈയിൽ നിന്നെത്തിയ കടമ്പഴിപ്പുറം സ്വദേശി (38), ലണ്ടനിൽ നിന്നെത്തിയ അമ്പലപ്പാറ സ്വദേശി (30), ബാംഗ്ലൂരിൽ നിന്ന് 18ന് നാട്ടിലെത്തിയ കഞ്ചിക്കോട് സ്വദേശി (29) എന്നിവരാണ് മറ്റ് രോഗബാധിതർ.

ഇതിൽ മുണ്ടൂർ സ്വദേശിയുടെ സാമ്പിൾ 24നും മറ്റുള്ളവരുടെത് തൊട്ടടുത്ത ദിവസത്തിൽ ജില്ലാ ആശുപത്രിയിൽ നിന്നുമാണ് പരിശോധനയ്ക്ക് എടുത്തിട്ടുള്ളത്.

അന്യസംസ്ഥാനങ്ങളിൽ നിന്ന് ജില്ലയിലേക്കെത്തിയ എല്ലാവർക്കും ഇരുസംസ്ഥാനങ്ങളുടെയും യാത്രപാസ് ഉണ്ടായിരുന്നു. രോഗം സ്ഥിരീകരിച്ചവരെ ജില്ലാ ആശുപത്രിയിലേക്ക് മാറ്റി.

നിലവിൽ മലപ്പുറം, ഇടുക്കി, പൊന്നാനി സ്വദേശികളായ മൂന്നുപേർ, രണ്ട് തൃശൂർ സ്വദേശികളും ഇന്നലെ രോഗം സ്ഥിരീകരിച്ച ആസാം സ്വദേശിയും ഉൾപ്പെടെ 89 പേർ ജില്ലയിൽ ചികിത്സയിലുണ്ട്. ഒരു മങ്കര സ്വദേശി എറണാകുളത്തും നെല്ലായ സ്വദേശി മഞ്ചേരിയിലും ചികിത്സയിലുണ്ട്.