പാലക്കാട്: ജില്ലയിൽ ഇന്നലെ 16 പേർക്ക് കോവിഡ് 19 സ്ഥിരീകരിച്ചു. ഇതോടെ ചികിത്സയിൽ കഴിയുന്നവരുടെ എണ്ണം 105 ഉയർന്നു. ഇതിൽ രണ്ടുപേർക്ക് രേഗംപകർന്നത് സമ്പർക്കത്തിലൂടെയാണ്. മറ്റുള്ളവർ വിദേശത്തുനിന്നും അന്യസംസ്ഥാനങ്ങളിൽ നിന്നും എത്തിയവരാണ്.

ചെന്നൈ (5), അബുദാബി( 5), മുംബൈ, കർണാടക, ഡൽഹി, ബാംഗ്ലൂർ എന്നിവിടങ്ങളിൽ നിന്നെത്തിയ ഓരോ ആൾക്കുമാണ് ഇന്നലെ രേഗം സ്ഥിരീകരിച്ചത്.

മെയ് 22ന് ചെന്നൈയിൽ നിന്നും വന്ന കൊപ്പം സ്വദേശി(68), മെയ് 20ന് ചെന്നൈയിൽ നിന്നും വന്ന ഒറ്റപ്പാലം പാലാട്ട് റോഡ് സ്വദേശി (83), മെയ് 20ന് ചെന്നൈയിൽ നിന്നും വന്ന ആനക്കര സ്വദേശി (23), ഈ മാസം 13ന് ചെന്നൈയിൽ നിന്നും വന്ന അലനല്ലൂർ സ്വദേശി(19), ചെന്നൈയിൽ നിന്നും വന്ന ശ്രീകൃഷ്ണപുരം സ്വദേശി(23), മെയ് 11ന് അബുദാബിയിൽ നിന്നും വന്ന വല്ലപ്പുഴ സ്വദേശി(44), വാണിയംകുളം സ്വദേശി (29), മെയ് 18ന് അബുദാബിയിൽ നിന്നും വന്നിട്ടുള്ള ശ്രീകൃഷ്ണപുരം കാട്ടുകുളം സ്വദേശി (35), കേരളശ്ശേരി വടശ്ശേരി സ്വദേശി (35), പഴമ്പാലക്കോട് സ്വദേശി (28), മെയ് 23ന് മുംബൈയിൽ നിന്നെത്തിയ തൃക്കടീരി സ്വദേശി (42), മെയ് 19ന് ബാംഗ്ലൂരിൽ നിന്നും എത്തിയ അലനല്ലൂർ സ്വദേശി (25), മെയ് 18 ഡൽഹിയിൽ നിന്നെത്തിയ കോട്ടോപ്പാടം സ്വദേശി(22), കർണാടകയിലെ ഭടകലിൽ നിന്നും കുടുംബത്തോടൊപ്പം യാത്ര ചെയ്‌തെത്തിയ കോട്ടോപ്പാടം സ്വദേശി(54)എന്നിവർക്കാണ് രോഗം സ്ഥിരീകരിച്ചിട്ടുള്ളത്.

കൂടാതെ മഹാരാഷ്ട്രയിൽ നിന്നും എത്തിയ രോഗലക്ഷണങ്ങൾ ഉള്ള വ്യക്തിയുടെ (ഇദ്ദേഹത്തിന്റെ പരിശോധനാ ഫലം ലഭ്യമായിട്ടില്ല) അമ്മയായ കണിയാപുരം സ്വദേശിക്കും (58), മെയ് നാലിന് ചെന്നൈയിൽ നിന്നും എത്തി മെയ് 23 രോഗം സ്ഥിരീകരിച്ച വ്യക്തിയുമായി സമ്പർക്കമുണ്ടായ റേഷൻ കട നടത്തുന്ന ഒരു കടമ്പഴിപ്പുറം സ്വദേശിക്കും (56) സമ്പർക്കത്തിലൂടെ രോഗം സ്ഥിരീകരിച്ചിട്ടുണ്ട്.