പ​ത്ത​നം​തിട്ട : അബുദാബി - ​തിരുവനന്തപുരം, ദുബായ് ​ - കൊച്ചി വിമാനങ്ങളിൽ കഴിഞ്ഞ ദിവസം വൈകിട്ട് പത്തനംതിട്ട ജില്ലക്കാരായ 35 പ്രവാസികൾ എത്തി. ഇവരിൽ 15 പേരെ തിരുവല്ലയിലെയും കുമ്പനാട്ടെയും കൊവിഡ് കെയർ സെന്ററിൽ നിരീക്ഷണത്തിലാക്കി.
അബുദാബി ​ തിരുവനന്തപുരം വിമാനത്തിൽ 11 പുരുഷൻമാരും നാല് സ്ത്രീകളും ഒരു കുട്ടിയും ഉൾപ്പെടെ ജില്ലയിലെ 16 പേരാണ് എത്തിയത്. ഒൻപത് പുരുഷൻമാരും രണ്ട് സ്ത്രീകളും ഉൾപ്പെടെ 11 പേരെ കെ.എസ്.ആർ.ടി.സി ബസിൽ തിരുവല്ല ശാന്തിനിലയം കൊവിഡ് കെയർ സെന്ററിൽ പ്രവേശിപ്പിച്ചു. ഒരു കുട്ടിയും രക്ഷിതാക്കളും രണ്ടു പ്രായമായവരും ഉൾപ്പെടെ ഈ വിമാനത്തിൽ എത്തിയ അഞ്ചു പേർ ടാക്‌​സികളിൽ വീട്ടിൽ എത്തി നിരീക്ഷണത്തിൽ കഴിയുന്നു.
ദുബായ് ​ - കൊച്ചി വിമാനത്തിൽ ജില്ലയിൽ നിന്നുള്ള 19 പേരാണ് എത്തിയത്. 19 പേരിൽ 14 സ്ത്രീകളും മൂന്നു പുരുഷൻമാരും രണ്ടു കുട്ടികളും ഉൾപ്പെടുന്നു. ഈ വിമാനത്തിൽ എത്തിയ നാലുപേരെ കുമ്പനാട് കൊവിഡ് കെയർ സെന്ററിൽ നിരീക്ഷണത്തിലാക്കി. ഈ വിമാനത്തിലെത്തിയ 10 ഗർഭിണികളും മൂന്നു പ്രായമായവരും രണ്ടു കുട്ടികളും ഉൾപ്പെടെ 15 പേർ ടാക്‌​സിൽ വീട്ടിലെത്തി നിരീക്ഷണത്തിൽ പ്രവേശിച്ചു.