റാന്നി: ഇടമുറി ഗവ.ഹയർ സെക്കൻഡറി സ്‌കൂൾ അത്യാധുനിക നിലവാരത്തിലാക്കുന്നതിന്റെ ഭാഗമായി പുതിയ കെട്ടിടത്തിന്റെ നിർമ്മാണം ആരംഭിച്ചു.കിഫ്ബി പദ്ധതിയിൽ 3.27 കോടി രൂപ മുതൽ മുടക്കിൽ മൂന്ന് നിലകളായിട്ടാണ് കെട്ടിടം നിർമ്മിക്കുന്നത്.കെട്ടിട നിർമ്മാണത്തിന്റെ ഔപചാരിക ഉദ്ഘാടനം ലോക്ക്ഡൗണിന് ശേഷം രാജു എബ്രഹാം എംഎൽഎ നിർവഹിക്കുമെന്ന് പി.ടി.എ പ്രസിഡന്റ് എം.വി പ്രസന്നകുമാർ പറഞ്ഞു.കിഫ്ബിയ്ക്ക് പദ്ധതിയിൽ നിർമ്മിക്കുന്ന കെട്ടിടത്തിന്റെ നിർമ്മാണ ചുമതല വാഫ്‌കോസിനാണ് .കരുനാഗപ്പള്ളി ആസ്ഥാനമായുള്ള സൗത്ത് ഇൻഡ്യൻ കൺസ്ട്രക്ഷൻ കമ്പനിയാണ് കരാറെടുത്തിരിക്കുന്നത്.ഒൻപതു മാസമാണ് കരാർ കാലാവധി.മണ്ണ് പരിശോധന പൂർത്തിയാക്കിയ ശേഷം ബീമുകളും പില്ലറുകളും സ്ഥാപിക്കാനുള്ള ട്രഞ്ച് മണ്ണുമാന്തി യന്ത്രമുപയോഗിച്ച് നിർമ്മിക്കുന്ന പണികൾ പുരോഗമിക്കുകയാണ്. അക്കാഡമിക് ബ്ലോക്കിനായിട്ടാണ് കെട്ടിടം നിർമ്മിക്കുന്നത്.ഗ്രൗണ്ട് ഫ്‌ളോറിൽ നാല് ക്ലാസ് മുറികൾ, അടുക്കള ,ഡൈനിംങ് ഹാൾ,സ്റ്റോർ റൂം, ശുചിമുറികൾ എന്നിവയുണ്ടാകും. ഒന്നാം നിലയിൽ ആറ് ക്ലാസ് മുറികളും ശുചിമുറികളുമാണുണ്ടാവുക.രണ്ടാം നിലയിൽ നാല് ക്ലാസ് മുറികൾ,ഒരു സ്റ്റാഫ് റും,ശുചിമുറികൾ എന്നിവയുണ്ട്.രണ്ടു വശത്തായുള്ള പടി കെട്ടുകൾ ,അംഗപരിമിതർക്കായുള്ള റാംമ്പ്, ശുചിമുറി എന്നിവയും പുതിയ കെട്ടിടത്തിലുണ്ടാവും.കെട്ടിടം പൂർത്തിയാവുന്നതോടെ വിദ്യാഭ്യാസ രംഗത്ത് ഇടമുറി ഗവ.ഹയർ സെക്കൻഡറി സ്‌കൂൾ വലിയൊരു കുതിച്ചുചാട്ടമാണ് നടത്തുക.