പത്തനംതിട്ട: ജില്ലയിൽ ഇന്നലെ നാല് കൊവിഡ്19 കേസുകൾ സ്ഥിരീകരിച്ചു. ജില്ലയിൽ ഇതുവരെ ആകെ 48 പേർക്ക് രോഗം സ്ഥിരീകരിച്ചിട്ടുണ്ട്. ജില്ലയിൽ ഇതുവരെ 19 പേർ രോഗവിമുക്തരായി. നിലവിൽ 28 പേർ രോഗികളായിട്ടുണ്ട്. ഇതിൽ 25 പേർ പത്തനംതിട്ട ജില്ലയിലും, മൂന്നു പേർ ജില്ലയ്ക്ക് പുറത്തും ചികിത്സയിലാണ്. ജനറൽ ആശുപത്രി പത്തനംതിട്ടയിൽ 25 പേരും, ജില്ലാ ആശുപത്രി കോഴഞ്ചേരിയിൽ നാലു പേരും, ജനറൽ ആശുപത്രി അടൂരിൽ ആറു പേരും റാന്നി മേനാംതോട്ടം ആശുപത്രിയിൽ മൂന്നു പേരും ഐസൊലേഷനിൽ ഉണ്ട്.
സ്വകാര്യ ആശുപത്രികളിൽ 21 പേർ ഐസൊലേഷനിൽ ഉണ്ട്. ജില്ലയിൽ ആകെ 59 പേർ വിവിധ ആശുപത്രികളിൽ ഐസോലേഷനിൽ ആണ്. പുതിയതായി ആറു പേരെ ഐസൊലേഷനിൽ പ്രവേശിപ്പിച്ചു. ജില്ലയിൽ 58 കോൺടാക്ടുകൾ നിരീക്ഷണത്തിൽ ഉണ്ട്. മറ്റ് സംസ്ഥാനങ്ങളിൽ നിന്നും തിരിച്ചെത്തിയ 3316 പേരും വിദേശത്തുനിന്നും തിരിച്ചെത്തിയ 728 പേരും നിലവിൽ നിരീക്ഷണത്തിലാണ്.
ആകെ 4102 പേർ നിരീക്ഷണത്തിലാണ്. ജില്ലയിൽ വിദേശത്തുനിന്നും, മറ്റ് സംസ്ഥാനങ്ങളിൽ നിന്നും തിരിച്ചെത്തുന്നവരെ താമസിപ്പിക്കുന്നതിന് ഇതുവരെ 111 കോവിഡ് കെയർ സെന്ററുകൾ സജ്ജീകരിച്ചിട്ടുണ്ട്.

ഇന്നലെ രോഗം സ്ഥിരീകരിച്ചവർ

1) മേയ് 20ന് കുവൈറ്റിൽ നിന്ന് കുവൈറ്റ് - തിരുവനന്തപുരം വിമാനത്തിൽ എത്തിയ കുരമ്പാല സ്വദേശിനിയായ 31 വയസുകാരി. 2)മേയ് 22ന് ഡൽഹിയിൽ നിന്ന് ഡൽഹി - തിരുവനന്തപുരം ട്രെയിനിൽ എത്തിയ അട്ടച്ചാക്കൽ സ്വദേശിനിയായ 58 വയസുകാരി.

3)മേയ് 22ന് മഹാരാഷ്ട്ര താനെയിൽ നിന്ന് ഡൽഹി - തിരുവനന്തപുരം ട്രെയിനിൽ എത്തിയ സീതത്തോട് സ്വദേശിനിയും ഗർഭിണിയുമായ 30 വയസുകാരി സ്റ്റാഫ് നഴ്‌സ്.

4)മേയ് 26 ന് ഡൽഹിയിൽ നിന്ന് രാജധാനി എക്‌സപ്രസിൽ എത്തിയ വെസ്റ്റ് ഓതറ സ്വദേശിനിയായ 64 വയസുകാരി.