മലയാലപ്പുഴ: പൊതീപ്പാട്ട് കഴിഞ്ഞ ദിവസം പുലിയുടെ സാന്നിദ്ധ്യമുണ്ടായതായി അഭ്യൂഹം. പൊതീപ്പാട്, കോഴികുന്നത്ത് മോഹനന്റെ തൊഴുത്തിൽ കെട്ടിയ പശു അസ്വസ്തത പ്രകടിപ്പിച്ചതിനെ തുടർന്നാണ് സ്ഥലവാസികൾക്ക് സംശയമുണ്ടായത്. തൊഴുത്തിൽ നിന്നിറങ്ങാൻ പശു മടി കാണിച്ചത് വീട്ടുകാരിൽ സംശയം ജനിപ്പിച്ചു.തുടർന്ന് നടത്തിയ പരിശോധനയിൽ പറമ്പിൽ പുലിയുടേതിന് സമാനമായ കാൽപ്പാടുകൾ കാണുകയും വടശേരിക്കര റേഞ്ച് ഓഫീസിൽ നിന്നെത്തിയ വനപാലകർ സ്ഥലത്തെത്തി പരിശോധന നടത്തി കാൽപ്പാടുകൾ പുലിയുടേതല്ലെന്ന് സ്ഥിരീകരിക്കുകയുമായിരുന്നു.കാൽപ്പാടുകൾ കാട്ടുപൂച്ചയുടെതാണെന്നാണ് നിഗമനം. രണ്ടാഴ്ച മുൻപ് സമീപപ്രദേശങ്ങളായ മുക്കുഴി വട്ടത്തറയിലും,കുമ്പഴത്തോട്ടത്തിലെ കോട്ടമലയിലും പുലിയെ കണ്ടതായി അഭ്യൂഹമുണ്ടായിരുന്നു.