കൊല്ലം: വീട്ടുപരിസരത്ത് കളിച്ചുകൊണ്ടിരിക്കെ കോൺക്രീറ്റ് ജനൽ മറിഞ്ഞുവീണ് പിഞ്ചുബാലൻ മരിച്ചു. കുളത്തൂപ്പുഴ കല്ലുവെട്ടാൻകുഴി ഷാ മൻസിലിൽ മുഹമ്മദ് ഷാൻ-ജസ്ന ദമ്പതികളുടെ മകൻ അയാൻ ഷായാണ് മരിച്ചത്.

മുഹമ്മദ് ഷാന് വീട്ടിൽ കോൺക്രീറ്റ് കട്ടളയും ജനലും നിർമ്മിച്ച് വിൽക്കുന്ന ജോലിയാണ്. വീടിനോട് ചേർന്നാണ് നിർമ്മാണ പ്രവർത്തനങ്ങൾ. രണ്ട് നില വീടിന്റെ ആദ്യ നില റോഡ് നിരപ്പിന് താഴെയാണ്. ഇവിടെയാണ് വീടിന്റെ അടുക്കളയും കോൺക്രീറ്റ് ജനൽ, കട്ടിള നിർമ്മാണ യൂണിറ്റുമുള്ളത്. അയാൻഷാ ഈ ഭാഗത്ത് കളിച്ചുകൊണ്ട് നിൽക്കുകയായിരുന്നു. അമ്മ മുകളിലത്തെ നിലയിൽ കൊച്ചുകുട്ടികൾക്ക് ട്യൂഷനെടുത്തുകൊണ്ടിരിക്കുമ്പോഴായിരുന്നു അപകടം. അയാൻഷായെ ഏറെനേരമായിട്ടും കാണാതിരുന്നതോടെ അമ്മ താഴേയ്ക്ക് ഇറങ്ങിച്ചെന്നപ്പോഴാണ് കോൺക്രീറ്റ് ജനൽ മറിഞ്ഞ് ദേഹത്ത് വീണ് അനക്കമില്ലാത്ത നിലയിൽ അയാനെ കണ്ടെത്തിയത്.

അതുവഴി കടന്നുപോയ ബി.എസ്.എൻ.എല്ലിന്റെ വാഹനത്തിൽ കുട്ടിയെ ഉടൻതന്നെ കടയ്ക്കൽ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നാളെ പോസ്റ്റുമോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുക്കും. അബിൻഷാ സഹോദരനാണ്. കുളത്തൂപ്പുഴ പൊലീസ് കേസെടുത്തു.