തൊടിയൂർ : കേരള സർക്കാരിന്റെ സുഭിക്ഷ കേരളം പദ്ധതിയുടെ ഭാഗമായി നൂറു ഗ്രന്ഥശാലകൾ, നൂറു കൃഷിയിടങ്ങൾ എന്ന സമഗ്ര കാർഷിക വ്യാപന പരിപാടി നടപ്പാക്കാൻ കരുനാഗപ്പള്ളി താലൂക്ക് ലൈബ്രറി കൗൺസിൽ തീരുമാനിച്ചു. ചെറുതോ വലുതോ ആയ ഒരു കൃഷിയിടം എല്ലാ ലൈബ്രറിയും ഒരുക്കും. ഗ്രന്ഥശാലകളിലെ കാർഷിക സബ്‌കമ്മിറ്റികൾ കൃഷി നടത്തിപ്പിന് മേൽനോട്ടം വഹിക്കും. 100 ഏക്കർ സ്ഥലത്ത് പുതുതായി കൃഷി ചെയ്യാനാണ് ഉദ്ദേശിക്കുന്നതെന്ന് താലൂക്ക് ലൈബ്രറി കൗൺസിൽ പ്രസിഡന്റ് അഡ്വ. പി.ബി. ശിവനും സെക്രട്ടറി വി. വിജയകുമാറും അറിയിച്ചു. പരിപാടിയുടെ താലൂക്കുതല ഉദ്‌ഘാടനം കുലശേഖരപുരം പുളിനിൽക്കുംകോട്ട എൻ.എസ് ലൈബ്രറിയിൽ താലൂക്ക് സെക്രട്ടറി വി. വിജയകുമാർ നിർവഹിച്ചു. 2 ഏക്കർ സ്ഥലത്ത് കരനെൽക്കൃഷിക്ക് വിത്തെറിഞ്ഞു കൊണ്ടാണ് ഉദ്ഘാടനം നടന്നത്. ഗ്രന്ഥശാലാ പ്രസിഡന്റ് സാബു അദ്ധ്യക്ഷനായി.സെക്രട്ടറി ബി. സുധർമ്മ സ്വാഗതം പറഞ്ഞു. കൃഷി ഓഫീസർ വി.ആർ. ബിനീഷ്, ജില്ലാ ലൈബ്രറി കൗൺസിൽ അംഗങ്ങളായ വി.പി. ജയപ്രകാശ് മേനോൻ, ജി. രവീന്ദ്രൻ, നേതൃത്വ സമിതി കൺവീനർ ശരത്ചന്ദ്രനുണ്ണിത്താൻ, എൻ.എസിന്റെ സഹധർമ്മിണി പത്മാവതി ടീച്ചർ, പി. ഉണ്ണി, എം.ആർ. ദീപക്, അശോകൻ, ഗോപിനാഥൻപിള്ള ,ലൈബ്രേറിയൻ പ്രസന്ന എന്നിവർ പങ്കെടുത്തു.