കൊല്ലം: ലോക്ക് ഡൗൺ കാലത്തെ സംഘടനാ പ്രവർത്തനത്തിന്റെ ഭാഗമായി ആൾ കേരള സ്കൂൾ ടീച്ചേഴ്സ് യൂണിയൻ (എ.കെ.എസ്.ടി.യു) 'അറിവിനൊപ്പം കൃഷിയും' പദ്ധതി നടപ്പാക്കുന്നു. ഇതിന്റെ സംസ്ഥാന തല ഉദ്ഘാടനം ഇന്ന് മന്ത്രി വി.എസ്. സുനിൽകുമാർ വെളിയത്ത് നിർവഹിക്കും. രാവിലെ 11ന് നടക്കുന്ന ഉദ്ഘാടന യോഗത്തിൽ ജി.എസ്. ജയലാൽ എം.എൽ.എ അദ്ധ്യക്ഷത വഹിക്കും. എ.കെ.എസ്.ടി.യു സംസ്ഥാന പ്രസിഡന്റ് എൻ. ശ്രീകുമാർ, ഭാരവാഹികളായ എസ്. ഹാരിസ്, എൻ. ഗോപാലകൃഷ്ണൻ, കെ.എസ്. ഷിജുകുമാർ തുടങ്ങിയവർ സംസാരിക്കും. കരനെൽക്കൃഷിക്കൊപ്പം ഇഞ്ചി, മഞ്ഞൾ, വാഴ, ചേന, ചേമ്പ് തുടങ്ങിയവ വിളയിച്ചെടുക്കുന്നതാണ് പദ്ധതി. മുഖ്യമന്ത്രിയുടെ ദുരിതാശ്വാസ നിധിയിലേക്ക് അഞ്ചുലക്ഷം രൂപ പി.പി.ഇ.കിറ്റിനായി സംഘടന നൽകിയിരുന്നു. കുട്ടികൾക്കായി ഒരു ലക്ഷം മാസ്കുകൾ നിർമ്മിച്ചു കൊടുക്കാനും തീരുമാനിച്ചിട്ടുണ്ട്.