ഇന്നും പല രാജ്യങ്ങളിലും പരസ്യമായും രഹസ്യമായും ആചരിച്ചുപോരുന്ന അന്ധവിശ്വാസങ്ങളും ആചാരങ്ങളുമുണ്ട്. ഇത്തരത്തിൽ കാഴ്ചക്കാരുടെ ഹൃദയമിടിപ്പ് കൂട്ടുന്ന തരത്തിലുള്ള ഒരു വിചിത്ര ആചാരമാണ് സ്‌പെയിനിൽ ഉള്ളത്. കൊച്ചുകുട്ടികളെ നിരത്തിക്കിടത്തിയശേഷം മുകളിലൂടെ ചാടിച്ചാടി പോകുന്നതാണ് ഈ ചടങ്ങ്. പിശാചിന്റെ വേഷം കെട്ടി മുഖം മൂടി ധരിച്ച ആളുകളാണ് ചാടുന്നത്. കൈയിലെ ചാട്ട വച്ച് കൂടി നിൽക്കുന്ന ആളെ അടിക്കുന്നതും ആചാരത്തിൽ പെടും. എല്ലാവർഷവും നടത്തപ്പെടുന്ന ഈ ആചാരം 1620ൽ ആരംഭിച്ചതാണ്. കുട്ടികളെ ദുരാത്മക്കളിൽ നിന്നും രക്ഷിക്കാനായി നടത്തുന്ന ഈ ആചാരം വലിയ ആഘോഷമായിട്ടാണ് സ്‌പെയിനിൽ നടത്താറ്. എൽ കൊളാച്ചൊ എന്നാണ് പേര്. ഡെവിൾസ് ജംപ് എന്നും ഇത് അറിയപ്പെടുന്നു.

കഴിഞ്ഞ ഒരു വർഷത്തിനുള്ളിൽ ജനിച്ച കുട്ടികളെയാണ് ഈ ആചാരത്തിനായി ഉപയോഗിക്കുന്നത്. കുട്ടികളെ തെരുവിൽ പായയിൽ കിടത്തും. കൈയിൽ വലിയ ചാട്ടവാറുകളും മറ്റും പിടിച്ചാണ് ചെകുത്താന്റെ വേഷം കെട്ടിയയാൾ ചാട്ടം നടത്തുന്നത്. ഈ ആചാരത്തിന്റെ തുടക്കത്തെക്കുറിച്ച് അറിവില്ലെങ്കിലും കുട്ടികളെ അവരുടെ ജന്മപാപത്തിൽ നിന്ന് രക്ഷിക്കുന്നതിനും ജീവിതത്തിൽ എല്ലാവിധ നന്മകളും ഉണ്ടാകുന്നതിനും ദുഷ്ടശക്തികളിൽ നിന്ന് രക്ഷ നേടുന്നതിനും ഇത് ഉപകരിക്കുമെന്നാണ് കരുതപ്പെടുന്നത്.