തൃശൂർ: ആന്ധ്രയിൽ നിന്നും തണ്ണിമത്തൻ ലോറിയിൽ 20 ലക്ഷം രൂപ വിലമതിക്കുന്ന 20 കിലോയിലേറെ കഞ്ചാവ് ഒളിച്ചു കടത്തിയ രണ്ടു പേരെ തൃശൂർ ഷാഡോ പൊലീസ് പിടികൂടി. ആന്ധ്രയിൽ നിന്നും കഞ്ചാവ് കയറ്റി തമിഴ്നാടെത്തിച്ച് അവിടെ നിന്നും തണ്ണിമത്തൻ കയറ്റിയാണ് തൃശൂരിലെത്തിയത്. തളിക്കുളം പണിക്ക വീട്ടിൽ ഷാഹിദ് (30) , മണത്തല നേനത്ത് ഷാമോൻ (34 ) എന്നിവരെയാണ് പൊലീസ് അറസ്റ്റ് ചെയ്തത്. ഷാഹിദ് കൊവിഡ് സമയത്ത് പരോളിൽ ഇറങ്ങിയതാണ്. സിറ്റി പൊലീസ് കമ്മിഷണർക്ക് കിട്ടിയ രഹസ്യവിവരത്തെ അടിസ്ഥാനത്തിൽ തൃശൂർ എ.സി.പി വി.കെ രാജു, സി. ബ്രാഞ്ച് എ.സി.പി ശ്രീനിവാസൻ, ഈസ്റ്റ് സി.ഐ ലാൽ കുമാർ പി, എസ്.ഐ പി.എം വിമോദ്, വിപിൻ ജോസഫ്, ഷാഡോ പൊലീസ് എസ്.ഐ ഗ്ലാഡ്സൺ, സുവ്രതകുമാർ എൻ.ജി, റാഫി, രാജൻ, എ.എസ്.ഐ ഗോപാലകൃഷ്ണൻ, സീനിയർ രാഗേഷ് .പി, സി.പി.ഒമാരായ പഴനി സ്വാമി, ജീവൻ, ലിജേഷ് എം.എസ്, വിപിൻദാസ് എന്നിവരുണ്ടായിരുന്ന സംഘമാണ് അറസ്റ്റ് ചെയ്തത്.