തൃശൂർ: കൊവിഡ് 19 തുടർ വിദ്യാഭ്യാസ പരിപാടിയുടെ ഉദ്ഘാടനം ഇന്ന് നടക്കും. ആരോഗ്യ സർവകലാശാലയിലെ അദ്ധ്യാപകർക്കായി കൊവിഡിന്റെ ഏറ്റവും പുതിയ ഗവേഷണ രീതികളെക്കുറിച്ച് ഓൺലൈനായാണ് തുടർവിദ്യാഭ്യാസ പരിപാടി നടത്തുന്നത്. ഇന്റർനെറ്റ് ആസ്പദമാക്കി വിദൂര അദ്ധ്യാപന രീതിയിൽ നടത്തുന്ന ഈ പരിപാടിയിൽ കേരളത്തിലെ നൂറിൽപരം അദ്ധ്യാപകർ പങ്കെടുക്കും.

ക്‌ളാസുകളുടെ ഉദ്ഘാടനം ഇന്ന് ഉച്ചയ്ക്ക് രണ്ടിന് ആരോഗ്യ സർവകലാശാല വൈസ് ചാൻസലർ ഡോ. മോഹൻ കുന്നമ്മേൽ നിർവഹിക്കും. തുടർന്ന് കൊവിഡ് 19 നെക്കുറിച്ചുള്ള ഏറ്റവും പുതിയ വൈജ്ഞാനിക കണ്ടെത്തലുകൾ, ഗവേഷണ രീതികൾ, കേരളത്തിന്റെ പശ്ചാത്തലത്തിൽ ഏറ്റെടുക്കേണ്ട മുൻഗണനകൾ, കൊവിഡ് 19 പ്രതിരോധത്തിന്റെ ശാസ്ത്രീയ മാർഗ്ഗങ്ങൾ, നൂതനമായ പ്രതിരോധ രീതികൾ എന്നിവയെക്കുറിച്ച് ക്ലാസുകൾ നടക്കും.

കേരളത്തിലെ ആരോഗ്യസ്ഥാപനങ്ങളിലെ അദ്ധ്യാപകരെയും ഗവേഷകരെയും പരമാവധി ഗവേഷണത്തിനായി ലഭ്യമാക്കാൻ വേണ്ടിയാണ് ഈ കോഴ്‌സ് സംഘടിപ്പിച്ചിരിക്കുന്നത്.

കൂടുതൽ വിവരങ്ങൾക്ക് helpdesk@kuhs.ac.in എന്ന ഇ-മെയിലിലോ 04872207650, 04872207664 എന്നീ നമ്പറുകളിലോ ബന്ധപ്പെടാം.