ഇരിങ്ങാലക്കുട : മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള ധനശേഖരണത്തിന്റെ ഭാഗമായി സംസ്ഥാന വ്യാപകമായി ഡി.വൈ.എഫ്.ഐ സംഘടിപ്പിക്കുന്ന റീസൈക്കിൾ കേരള പദ്ധതിക്ക് മികച്ച പ്രതികരണം. ടൺ കണക്കിന് പ്ലാസ്റ്റിക്, സ്റ്റീൽ മാലിന്യങ്ങളും മറ്റു പഴയ വസ്തുക്കളും ഡി.വൈ.എഫ്.ഐ പ്രവർത്തകർ ശേഖരിച്ചു. പാഴ്‌സ്തുക്കൾ ശേഖരിക്കുന്നതിന് പുറമെ, നാളികേരം, മറ്റ് നാടൻ വിഭവങ്ങളും ശേഖരിച്ചു വിൽപന നടത്തിയും മഴക്കാല പൂർവ്വ ശുചീകരണം നടത്തിയും കായികാദ്ധ്വാനം നൽകിയും പണം സമാഹരിക്കും. കാമ്പയിന്റെ ഭാഗമായി രാഷ്ട്രീയ സാംസ്‌കാരിക സിനിമാ രംഗത്തെ നിരവധി പേരാണ് രംഗത്ത് വന്നത്. ചലച്ചിത്ര താരവും മുൻ എം.പി യുമായ ടി.വി. ഇന്നസെന്റ് റീസൈക്കിൾ കേരളയുടെ ഭാഗമായി വായിച്ച് തീർന്ന പത്രങ്ങളും ഉപയോഗ ശൂന്യമായ വസ്തുക്കളും ഡി.വൈ.എഫ്.ഐ ജില്ലാ സെക്രട്ടറി പി.ബി അനൂപിന് കൈമാറി. സംസ്ഥാന കമ്മിറ്റി അംഗം ആർ.എൽ ശ്രീലാൽ, ബ്ലോക്ക് പ്രസിഡന്റ് പി.കെ മനുമോഹൻ, ട്രഷറർ ഐ.വി സജിത്ത്, ജോ. സെക്രട്ടറി വി.എച്ച് വിജീഷ്, സെക്രട്ടേറിയറ്റ് അംഗം എം.വി ഷിൽവി, മേഖല സെക്രട്ടറി ഫിന്റോ പോൾസൻ എന്നിവർ പങ്കെടുത്തു.