തൃശൂർ: നാല് പേർക്ക് കൂടി രോഗബാധ സ്ഥിരീകരിച്ചതോടെ കൊവിഡ് ബാധിച്ച് ചികിത്സയിൽ കഴിയുന്നവരുടെ എണ്ണം 20 ആയി. 23 ന് ദുബായിൽ നിന്നെത്തിയെ ചാവക്കാട് സ്വദേശികളായ 32 കാരനും 28 വയസുളള യുവതിക്കും രോഗം സ്ഥിരീകരിച്ചു. ഇവർ കോഴിക്കോട് എം.വി.ആർ കാൻസർ സെന്റർ ആശുപത്രിയിൽ ചികിത്സയിലാണ്. 24 ന് അബുദാബിയിൽ നിന്നെത്തിയ പഴയന്നൂർ സ്വദേശി (42), വിദേശത്ത് നിന്ന് തന്നെ തിരിച്ചെത്തിയ തളിക്കുളം സ്വദേശി (45) എന്നിവർക്കും രോഗം സ്ഥിരീകരിച്ചിട്ടുണ്ട്.

ഇവർ തൃശൂർ മെഡിക്കൽ കോളേജ് ആശുപത്രിയിൽ ചികിത്സയിലാണ്. കൊവിഡ് പ്രതിരോധത്തിന്റെ ഭാഗമായി ജില്ലയിൽ ആശുപത്രികളിൽ കഴിയുന്ന 49 പേരുൾപ്പെടെ ആകെ 9706 പേരാണ് നിരീക്ഷണത്തിലുളളത്. ഇന്നലെ ആറ് പേരെ ആശുപത്രിയിൽ പ്രവേശിപ്പിച്ചു. ആറ് പേർ ആശുപത്രി വിട്ടു. ഇന്നലെ അയച്ച 73 സാമ്പിളുകൾ ഉൾപ്പെടെ ഇതു വരെ 2002 സാമ്പിളുകൾ പരിശോധനയ്ക്ക് അയച്ചതിൽ 98 എണ്ണത്തിന്റെ ഫലം ലഭിക്കാനുണ്ട്. വിവിധ മേഖലകളിലുളള 524 ആളുകളുടെ സാമ്പിളുകളും പരിശോധനയ്ക്ക് അയച്ചിട്ടുണ്ട്. 375 ഫോൺകോളുകൾ ജില്ലാ കൺട്രോൾ സെല്ലിൽ ലഭിച്ചു. 153 പേർക്ക് കൗൺസലിംഗ് നൽകി.