തിരുവനന്തപുരം: തമിഴ്നാട്ടിൽ നിന്ന് കേരളത്തിലേക്കുവന്ന മുപ്പതുമലയാളികളെ തമിഴ്നാട് പൊലീസ് കളിയിക്കാവിളയിലെ ചെക്പോസ്റ്റിൽ തടഞ്ഞു. ഇവർക്ക് തമിഴ്നാട് നൽകുന്ന പാസ് ഇല്ല എന്നകാരണം പറഞ്ഞാണത്രേ തടഞ്ഞത്.നോർക്കയുടെ പാസ് കാണിച്ചെങ്കിലും ഇതുപോരെന്നാണ് പൊലീസിന്റെ നിലപാട്. തമിഴ്നാടിന്റെ പാസിനെക്കുറിച്ച് തങ്ങൾക്ക് അറിയില്ലെന്ന് പറഞ്ഞെങ്കിലും പൊലീസ് ചെവിക്കൊണ്ടില്ല. തിരുവനന്തപുരം ജില്ലാ കളക്ടർ നാഗർകോവിൽ കളക്ടറുമായി ബന്ധപ്പെട്ടശേഷം നാഗർകോവിൽ കളക്ടർ അനുവദിക്കുകയാണെങ്കിൽ അതിർത്തി കടക്കാൻ അനുവദിക്കാം എന്നാണ് പൊലീസിന്റെ നിലപാട്. കന്യാകുമാരി, നാഗർകോവിൽ, തോവാള പ്രദേശങ്ങളിൽ നിന്നാണ് പതിനഞ്ചു വാഹനങ്ങളിലായി മുപ്പതുമലയാളികൾ കേരളത്തിലേക്ക് പുറപ്പെട്ടത്.