ആലപ്പുഴ: അന്യസംസ്ഥാന തൊഴിലാളികളുമായി ആലപ്പുഴയിൽ നിന്ന് ബീഹാറിലേക്കുള്ള നോൺ സ്റ്റോപ് ട്രെയിൻ ഇന്ന് ഉച്ചയ്ക്ക് ശേഷം പുറപ്പെടും. 1140 തൊഴിലാളികളാണ് ഈ ട്രെയിനിൽ നാട്ടിലേക്ക് പോകുന്നത്. ട്രെയിൻ ടിക്കറ്റിനുള്ള പണം തൊഴിലാളികൾ തന്നെ നൽകണമെന്നാണ് ജില്ലാ ഭരണകൂടം പറയുന്നത്.

സ്വദേശത്തേക്ക് മടങ്ങുന്നതിനായി മാവേലിക്കര, അമ്പലപ്പുഴ എന്നിവിടങ്ങളിൽ നിന്നും തൊഴിലാളികളെ ആലപ്പുഴ റെയിൽവേ സ്റ്റേഷനിൽ എത്തിക്കാൻ കെ.എസ്.ആർ.ടി.സി ബസുകൾ പുറപ്പെട്ടു. ഇവർക്ക് ആവശ്യമായ ഭക്ഷണം ഉൾപ്പെടെയുള്ള സൗകര്യങ്ങൾ സ്റ്റേഷനിൽ ഒരുക്കിയിട്ടുണ്ട്.

തൊഴിലാളികൾക്ക് ടിക്കറ്റ് ചാർജ് നൽകുമെന്ന് കോൺഗ്രസ് പ്രഖ്യാപിച്ചിരുന്നു. 10 ലക്ഷം രൂപ നൽകാമെന്ന് ആലപ്പുഴ ഡി.സി.സി അറിയിച്ചു. എന്നാൽ, ഈ തുക വാങ്ങാൻ സർക്കാർ അനുമതി ഇല്ലെന്നാണ് ജില്ലാ കളക്ടർ പറയുന്നത്. കഴിഞ്ഞ ദിവസം, കേരളത്തിൽ നിന്നും ബിഹാറിലേക്കുള്ള ട്രെയിനുകൾ ബീഹാർ സർക്കാരിന്റെ അനുമതി കിട്ടാത്തതിനെ തുടർന്ന് റദ്ദാക്കിയിരുന്നു.