അബുദാബി: കൊവിഡ് ബാധിക്കുന്നവരുടെ എണ്ണം കൂടുമ്പോൾ രോഗം ഭേദമാകുന്നവരുടെ എണ്ണവും കൂടുന്നതാണ് യു.എ.ഇയിൽ കാണുന്നത്. രോഗം ഭേദമാകുന്നത് ആശ്വാസം, എന്നാൽ രോഗം പിടിപെടുന്നവരുടെ എണ്ണം പെരുകുന്നത് ആശങ്ക പരത്തുന്നു. 462 പേർക്ക് കൂടി കൊവിഡ് സ്ഥിരീകരിച്ചതായി ആരോഗ്യ പ്രതിരോധ മന്ത്രാലയം അറിയിച്ചു. 187 പേർക്ക് രോഗം ഭേദമായപ്പോൾ 9 പേർ കൂടി മരിച്ചു.

രാജ്യത്ത് ആകെ കേസുകളുടെ എണ്ണം 15,192 ഉം ഭേദപ്പെട്ടവരുടെ എണ്ണം 3,153 ഉം മരണം 46 ഉം ആയി.

28,000 ത്തിലധികം പുതിയ ടെസ്റ്റുകളും രാജ്യത്ത് നടത്തിയതായി മന്ത്രാലയം അറിയിച്ചു.കഴിഞ്ഞ ദിവസം 567 കേസുകളാണ് യു.എ.ഇയിൽ റിപ്പോർട്ട് ചെയ്തത്. അബുദാബിയിലെ മുസഫയിൽ ഒരു പുതിയ കൊവിഡ് പരിശോധനാ കേന്ദ്രം തുറന്നു. ദുബായ് പൂർണമായും പരിശോധനയ്ക്ക് സജ്ജമാണെന്നും മതിയായ ഭക്ഷണസാധനങ്ങൾ ഉണ്ടെന്നും ദുബായ് കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അറിയിച്ചു.