തിരുവനന്തപുരം: തിരുവിതാംകൂർ ദേവസ്വം ബോർഡിന് കീഴിലുള്ള ക്ഷേത്രങ്ങളിൽ ഓൺലൈനായി പൂജകൾ, വഴിപാടുകൾ എന്നിവ ബുക്ക് ചെയ്യുന്നതിനും അന്നദാന സംഭാവന, ഇ-കാണിക്ക എന്നിവ അർപ്പിക്കുന്നതിനും സൗകര്യം ഏർപ്പെടുത്തി.

ശബരിമല ക്ഷേത്രത്തിൽ നേരത്തെ തന്നെ ഈ സൗകര്യങ്ങൾ തിരുവിതാംകൂർ ദേവസ്വം ബോർഡ് ഏർപ്പെടുത്തിയിരുന്നു. കോവിഡ്-19 വ്യാപനം തടയുന്നതിനുള്ള ലോക്ക്ഡൗൺ നിയന്ത്റണങ്ങൾ ഏർപ്പെടുത്തിയതിന്റെ ഭാഗമായി ഭക്തർക്ക് ക്ഷേത്രങ്ങളിൽ പ്രവേശനം ഇല്ലെങ്കിലും ക്ഷേത്രാചാര പ്രകാരമുള്ള പൂജകളും ചടങ്ങുകളും തടസമില്ലാതെ നടന്നുവരികയാണ്. ഈ സാഹചര്യത്തിലാണ് മേജർ ക്ഷേത്രങ്ങളിൽ ഓൺലൈനായി പൂജകൾ, വഴിപാടുകൾ എന്നിവ നടത്താൻ സൗകര്യം തിരുവിതാംകൂർ ദേവസ്വം ബോർഡ് ഏർപ്പെടുത്തിയിരിക്കുന്നത്.

ശബരിമല കൂടാതെ മേജർ ക്ഷേത്രങ്ങളായ അമ്പലപ്പുഴ ശ്രീകൃഷ്ണസ്വാമി ക്ഷേത്രം, കൊട്ടാരക്കര ഗണപതി ക്ഷേത്രം, ആറന്മുള പാർത്ഥസാരഥി ക്ഷേത്രം, ഹരിപ്പാട് സുബ്രഹ്മണ്യസ്വാമി ക്ഷേത്രം, പമ്പാ ഗണപതിക്ഷേത്രം, ഏ​റ്റുമാനൂർ മഹാദേവ ക്ഷേത്രം, വൈക്കം മഹാദേവ ക്ഷേത്രം, ചെട്ടികുളങ്ങര ദേവീ ക്ഷേത്രം തുടങ്ങിയ 27 മേജർ ക്ഷേത്രങ്ങളിൽ www.onlinetdb.com എന്ന വെബ്‌സൈ​റ്റ് മുഖേന ഭക്തർക്ക് വഴിപാടുകൾ ബുക്ക് ചെയ്യാവുന്നതാണ്. ശബരിമലയിലേക്കുള്ള അന്നദാന സംഭാവനകൾക്ക് ഭക്തർക്ക് ആദായ നികുതി ഇളവ് ലഭ്യമാകും.