ന്യൂഡല്‍ഹി: കേരളത്തിന് പുറത്തുള്ള സംസ്ഥാനങ്ങളില്‍ കുടുങ്ങിക്കിടക്കുന്ന വിദ്യാര്‍ത്ഥികളെ കേരളത്തിലെത്തിക്കാന്‍ പ്രത്യേക ട്രെയിന്‍ സർവീസ് ഏർപ്പെടുത്തുന്ന കാര്യത്തിൽ തീരുമാനമായി. ഡല്‍ഹിയില്‍ നിന്നായിരിക്കും ആദ്യ സര്‍വീസ്. പ്രത്യേക ട്രെയിനിന് റെയില്‍വേ മന്ത്രാലയം അനുമതി നല്‍കി.
ആഭ്യന്തര മന്ത്രാലയം കൂടെ അനുമതി നൽകിയാൽ സര്‍വീസ് ഉടന്‍ ആരംഭിക്കും. പ്രധാനമായും അഞ്ചുസംസ്ഥാനങ്ങളില്‍ നിന്നുള്ള വിദ്യാര്‍ത്ഥികളെയാണ് തിരികെ എത്തിക്കുന്നത്. പഞ്ചാബ്, ജമ്മുകശ്മീര്‍, ചണ്ഡീഗഢ്, ഡല്‍ഹി, രാജസ്ഥാന്‍ ഉള്‍പ്പടെയുള്ള അഞ്ചുസംസ്ഥാനത്ത് നിന്നുള്ള വിദ്യാര്‍ത്ഥികള്‍ക്കായിരിക്കും ട്രെയിൻ സർവീസ് ആദ്യ ഘട്ടത്തില്‍ ലഭ്യമാവുക.
ഡല്‍ഹി ഒഴികെയുള്ള സംസ്ഥാനങ്ങളിലെ വിദ്യാര്‍ത്ഥികളെ റോഡ് മാര്‍ഗം ഡല്‍ഹിയില്‍ എത്തിച്ച് ഇവിടെ നിന്ന് ട്രെയിനില്‍ അയക്കാനാണ് തീരുമാനം. ഈ സര്‍വീസ് വിദ്യാര്‍ത്ഥികള്‍ക്ക് മാത്രമായിരിക്കും ഉണ്ടായിരിക്കുക എന്ന് റെയില്‍വേ മന്ത്രാലയം വ്യക്തമാക്കി.