ആവശ്യമുള്ള സാധനങ്ങൾ

അരി, പച്ചരി, പുഴുക്കലരി - ആവശ്യത്തിന്
ഉഴുന്ന് - കാൽ കിലോ
ഉപ്പ് - ആവശ്യത്തിന്
ഉരുളക്കിഴങ്ങ് - അരക്കിലോ
സവാള - അരക്കിലോ
തക്കാളി - രണ്ട്
പച്ചമുളക് - മൂന്ന്
ഇഞ്ചി - ഒരു ചെറിയ കഷണം
കറിവേപ്പില - കുറച്ച്
കടുക് - കുറച്ച്
വറ്റൽ മുളക് - 5

തയ്യാറാക്കുന്ന വിധം

അരിയും ഉഴുന്നും നന്നായി കഴുകി എടുത്ത് വെവ്വേറെ പാത്രങ്ങളിൽ 10 മുതൽ 12 മണിക്കൂർ വരെ കുതിർത്ത് വെയ്ക്കുക. നന്നായി കുതിർന്നതിനു ശേഷം ആദ്യം ഉഴുന്നും പിന്നെ അരിയും വെവ്വേറെ മിക്‌സിയിൽ നന്നായി അരച്ചെടുക്കുക. അതിനുശേഷം ഈ രണ്ടു മാവും ഒന്നിച്ച് ഇളക്കി ഉപ്പും ചേർത്ത് വെയ്ക്കുക. കുറഞ്ഞത് ആറുമണിക്കൂർ നേരമെങ്കിലും വെയ്ക്കണം.

ഇനി അടുത്തതായി ഉരുളക്കിഴങ്ങ് പുഴുങ്ങി എടുക്കുക. ഇത് കഷണങ്ങളാക്കി വെയ്ക്കുക. ശേഷം ഒരു പാനിൽ എണ്ണ ഒഴിച്ച് കടുക്, വറ്റൽ മുളക് എന്നിവ മൂപ്പിച്ച് അതിലേക്ക് പച്ചക്കറികൾ ചെറുതായി അരിഞ്ഞത് ഇട്ട് നന്നായി വഴറ്റുക. വഴറ്റി കഴിഞ്ഞതിന് ശേഷം ഉരുളക്കിഴങ്ങ് പുഴുങ്ങിയത് ചേർക്കുക. ഇതാണ് ദോശക്ക് വേണ്ടിയുള്ള മസാലക്കൂട്ട്.

ഇനി നമുക്ക് ദോശ ഉണ്ടാക്കാം. ഇതിനായി ദോശ കല്ലിൽ എണ്ണ പുരട്ടി ചൂടാകുമ്പോൾ മാവ് ഒഴിച്ച് കനം കുറച്ച് പരത്തി (പറ്റുന്നത്ര കനം കുറയ്ക്കുക കനം കുറയുംന്തോറും നല്ല ക്രിസ്പി ആകും) ഒരു വശം ചുവക്കുമ്പോൾ രണ്ട് സ്പൂൺ മസാലക്കൂട്ട് വച്ച് ദോശ മടക്കി രണ്ടറ്റവും അമർത്തി കുറച്ച് എണ്ണ ഒഴിച്ച് മൊരിച്ച് എടുക്കുക. മസാലദോശ റെഡിയായി.