തിരുവല്ല: പാലിയേക്കര ബസേലിയൻ സിസ്റ്റേഴ്സ് മഠത്തിലെ വിദ്യാർത്ഥിനിയായ ദിവ്യ പി.ജോണിന്റേത് മുങ്ങിമരണമാണെന്ന് പ്രാഥമിക പോസ്റ്റുമോർട്ടം റിപ്പോർട്ട്. കോട്ടയം മെഡിക്കൽ കോളേജിലെ വിദഗ്ധരായ രണ്ടു ഫോറൻസിക് സർജന്മാരുടെ മേൽനോട്ടത്തിലാണ് പോസ്റ്റ്‌മോർട്ടം നടന്നത്.അസ്വാഭാവികമായി ഒന്നും കണ്ടെത്താൻ കഴിഞ്ഞിട്ടില്ലെന്നാണ് റിപ്പോർട്ട്. ശരീരത്തിൽ ബലപ്രയോഗത്തിന്റെ ലക്ഷണങ്ങളില്ല. കാലിൽ മാത്രമാണ് ചെറിയ മുറിവ് ഉണ്ടായിട്ടുളളത്. ഇത് കിണറ്റിൽ വീണപ്പോൾ ഉണ്ടായതാകാം എന്നാണ് നിഗമനം.
കഴിഞ്ഞദിവസമാണ് കന്യാസ്ത്രീയാകാൻ പഠിക്കുന്ന മല്ലപ്പള്ളി ചുങ്കപ്പാറ തടത്തേൽ മലയിൽ പള്ളിക്കാപ്പറമ്പിൽ ജോൺ ഫിലിപ്പോസിന്റെ മകളായ ദിവ്യ പി.ജോണിനെ മഠത്തിലെ കിണറ്റിൽ മരിച്ചനിലയിൽ കണ്ടെത്തിയത്. പ്രധാന കെട്ടിടത്തോടുചേർന്നുള്ള കിണറ്റിലാണ് മൃതദേഹം കണ്ടത്.
അതേസമയം കന്യാസ്ത്രീമഠത്തിലെ വിദ്യാർത്ഥിനിയെ കിണറ്റിൽ മരിച്ചനിലയിൽ കണ്ടെത്തിയ സംഭവത്തിൽ പത്തനംതിട്ട എസ്.പിയോട് വനിതാ കമ്മിഷൻ വിശദീകരണം തേടി.