തിരുവനന്തപുരം : സംസ്ഥാനത്ത് ഇന്നലെ ഒരാൾക്ക് കൊവിഡ് സ്ഥിരീകരിച്ചു. ചെന്നൈയിൽ നിന്നു വന്ന എറണാകുളം സ്വദേശിക്കാണ് രോഗം ബാധിച്ചതെന്ന് മുഖ്യമന്ത്രി പിണറായി വിജയൻ വാർത്താ സമ്മേളനത്തിൽ പറഞ്ഞു. മുപ്പതുവയസുകാരി​യായ ഇവർ വൃക്കരോഗ ചി​കി​ത്സയ്ക്കെത്തി​യതാണ്. 10 പേരുടെ പരിശോധനാ ഫലം നെഗറ്റീവായി. ഇവരെല്ലാം കണ്ണൂരിലുള്ളവരാണ്. ഇനി 16 പേരാണ് ആശുപത്രികളിലുള്ളത്. പുതിയ ഹോട്ട് സ്‌പോട്ടുകളില്ല. നിലവിൽ 33 ഹോട്ട് സ്‌പോട്ടുകൾ.

ആട്ടോ സർവീസ്: അനുമതി തേടും

ലോക്ക് ഡൗൺ കാലത്ത് ആട്ടോ റിക്ഷാ സർവീസ് പുനരാരംഭിക്കുന്നതിന് കേന്ദ്ര സർക്കാരിന്റെ അനുമതി തേടുമെന്ന് മുഖ്യമന്ത്രി പറഞ്ഞു. നിയന്ത്രണങ്ങൾക്ക് വിധേയമായി ആട്ടോയും ഓടട്ടേ എന്ന തലക്കെട്ടിൽ കേരളകൗമുദി ഇന്നലെ എഡിറ്റോറിയൽ പ്രസിദ്ധീകരിച്ചിരുന്നു. ഇതിന് പിന്നാലെയാണ് മുഖ്യമന്ത്രി ഇക്കാര്യം വ്യക്തമാക്കിയത്. മൂന്നാംഘട്ട ലോക്ക് ഡൗണിൽ ടാക്സികൾക്ക് അനുമതി നൽകിയെങ്കിലും ആട്ടോകളെ പരിഗണിച്ചിരുന്നില്ല.