തിരുവനന്തപുരം:ജില്ല വിട്ട് യാത്ര ചെയ്യുന്നതിന് ഓൺ ലൈൻ പാസ് ലഭിക്കുന്നതിന് അപേക്ഷിക്കാൻ ബുദ്ധി​മു​ട്ടു​ള്ളവർക്ക് അതത് പൊലീസ് സ്‌റ്റേഷനുകളിൽ നിന്ന്‌ നേരിട്ട് പാസ് വാങ്ങാമെന്നു സംസ്ഥാന പൊലീസ്‌ മേധാവി ലോക്‌നാഥ് ബെഹ്റ അറിയിച്ചു. ഇതിനായി പൊലീസിന്റെ വെബ്‌സൈറ്റിൽ ലഭ്യമായ പാസിന്റെ മാതൃക പൂരിപ്പിച്ചു സ്‌റ്റേഷൻ ഹൗസ് ഓഫീസർക്ക് നൽകിയാൽ മതി. പാസിന്റെ മാതൃകയിൽ ഫോട്ടോ പതിക്കുകയോ പാസിനായി പ്രത്യേക അപേക്ഷ നൽകുകയോ ചെയ്യേണ്ടതില്ല. പാസിന് അപേക്ഷിക്കുന്നവരുടെ വിവരങ്ങൾ ഉൾക്കൊള്ളിച്ച് പൊലീസ് സ്‌റ്റേഷനിൽ രജിസ്റ്റർ സൂക്ഷിക്കണം. ഇതിൽ അപേക്ഷകർ ഒപ്പിടുമ്പോൾ തിരിച്ചറിയൽ കാർഡ്‌ പൊലീസിനെ കാണിക്കണം. അയൽ ജില്ലയിലെ സ്വകാര്യ സ്ഥാപനങ്ങളിലും പ്രവർത്തനം അനുവദിക്കപ്പെട്ട കടകളിലും ജോലി ചെയ്യുന്നവർക്ക് ജില്ല വിട്ടു യാത്രചെയ്യുന്നതിന് പ്രത്യേക പാസ് അനുവദിക്കും. ഇതിനായി അതതു സ്‌റ്റേഷൻ ഹൗസ് ഓഫീസർമാരെയാണ് സമീപിക്കേണ്ടത്.