വിശുദ്ധമായ നോമ്പ് കാലം അതിന്റെ അവസാന നാളുകളിലേക്ക് അടുക്കുകയാണ്. ഈ സമയത്ത് അൽപം വ്യത്യസ്തതയോട് കൂടി പാചകവും ഗംഭീരമാക്കാം. കുട്ടികൾക്കും മുതിർന്നവർക്കും ഒരു പോലെ ഇഷ്ടപ്പെടുന്ന ഒന്നാണ് ചിക്കൻ കൊത്തു പൊറോട്ട. ഇനി ഹോട്ടലിൽ നിന്നും വാങ്ങിക്കാതെ ആരോഗ്യമുള്ള ഈ ഭക്ഷണം വീട്ടിൽത്തന്നെ കുട്ടികൾക്ക് തയ്യാറാക്കി കൊടുക്കാം. ചിക്കൻ കൊത്തു പൊറോട്ട എങ്ങനെ തയ്യാറാക്കുമെന്ന് നോക്കാം.

ആവശ്യമുള്ള സാധനങ്ങൾ

പൊറോട്ട- അഞ്ചെണ്ണം

സവാള - രണ്ടെണ്ണം

പച്ചമുളക് - അഞ്ചെണ്ണം

തക്കാളി - രണ്ടെണ്ണം

കുരുമുളക് പൊടി - രണ്ട് ടേബിൾ സ്പൂൺ

മുട്ട - മൂന്നെണ്ണം

ചിക്കൻ - ഉപ്പും കുരുമുളക് പൊടിയും ചേർത്ത് വേവിച്ചുടച്ചത് - കാൽകിലോ

ഉപ്പ് - പാകത്തിന്

എണ്ണ - പാകത്തിന്

കറിവേപ്പില - മൂന്ന് തണ്ട്

മല്ലിയില - ആവശ്യത്തിന്

തയ്യാറാക്കേണ്ട വിധം

ഒരു പിടി പൊറോട്ട ചെറുതായി മുറിച്ചെടുക്കണം. പിന്നീട് ഒരു ചട്ടിയിൽ എണ്ണ ഒഴിച്ച് മുറിച്ച് വെച്ച പൊറോട്ട മൊരിയിച്ചെടുക്കണം. മൊരിയിച്ചെടുത്ത പൊറോട്ട വേറൊരു പാത്രത്തിലേക്ക് മാറ്റി വെക്കാം. അതേ ചട്ടിയിൽ കുറച്ച് എണ്ണ ഒഴിച്ച് ഇതിലേക്ക് സവാള, പച്ചമുളക്, കറിവേപ്പില, തക്കാളി എന്നിവ ചേർത്ത് നല്ലതു പോലെ വഴറ്റിയെടുക്കാം. നന്നായി വഴറ്റിക്കഴിയുമ്പോൾ ഇതിലേക്ക് ഉപ്പ്, കുരുമുളക് പൊടി എന്നിവ ചേർക്കാം. ശേഷം മുട്ടയും തയ്യാറാക്കി വെച്ചിരിക്കുന്ന ചിക്കനും ചേർക്കാം. ഇവയെല്ലാം കൂടി നല്ലതു പോലെ മിക്‌സ് ആയി വരുമ്പോൾ ഇതിലേക്ക് മൊരിയിച്ച് വെച്ചിരിക്കുന്ന പൊറോട്ട ചേർക്കാം. സ്വാദിനായി അൽപം മല്ലിയില കൂടി ചേർക്കാം. ചൂടോട് കൂടി തന്നെ നല്ല ചിക്കൻ കൊത്തു പൊറോട്ട കഴിക്കാവുന്നതാണ്.