തിരുവനന്തപുരം: അനായാസം വെള്ളക്കരം ഓൺലൈനായി അടയ്ക്കുന്നതിനായി വാട്ടർ അതോറിറ്റിയുടെ ഇ -പേയ്മെന്റ് സംവിധാനം പരിഷ്കരിച്ചു. മൊബൈൽ സ്ക്രീനുകൾക്ക് കൂടി അനുയോജ്യമാകും വിധമാണ് വെബ്‌സൈറ്റ് പരിഷ്കരിച്ചിട്ടുള്ളത്. ഉപഭോക്താക്കളുടെ മൊബൈൽ നമ്പർ കണ്സ്യൂമർ നമ്പറുമായി ബന്ധിപ്പിക്കാനും വെബ്‌സൈറ്റിൽ സൗകര്യമുണ്ട്. ഇങ്ങനെ മൊബൈൽ നമ്പർ ബന്ധിപ്പിക്കുന്ന ഉപഭോക്താക്കൾക്ക് ബില്ലുകൾ സംബന്ധിച്ച അറിയിപ്പുകൾ എസ്.എം.എസ് മുഖേന ലഭിക്കും. ഓൺലൈൻ വഴി വെള്ളക്കരമടയ്ക്കാൻ https://epay.kwa.kerala.gov.in/ എന്ന ലിങ്ക് സന്ദർശിക്കണം. ഓൺലൈനായി വെള്ളക്കരം അടയ്ക്കുന്ന ഉപഭോക്താക്കൾക്ക് ബിൽ തുകയുടെ ഒരു ശതമാനം കിഴിവ് (ഒരു ബില്ലിൽ പരമാവധി 100 രൂപ) ലഭിക്കും.