ദുബായ്: ഗൾഫിൽ ഇന്ന് കൊവിഡ് ബാധിച്ച് മരിച്ചത് അഞ്ച് മലയാളികൾ. തൃശൂർ കുന്നംകുളം സ്വദേശി അശോക് കുമാർ, ചിറയിൻകീഴ് സ്വദേശി സജീവ് രാജ് എന്നിവരാണ് അബുദാബിയിൽ മരിച്ചത്. അമ്പത്തിമൂന്നുകാരനായ അശോക് കുമാർ നാട്ടിലേക്ക് മടങ്ങാനിരിക്കേയാണ് മരണം.

അമ്പത് വയസുള്ള സജീവിനെ പനിയെത്തുടർന്ന് വെള്ളിയാഴ്ചയാണ് അബുദാബിയിലെ ആശുപത്രിയിൽ പ്രവേശിപ്പിച്ചത്. ആറ്റിങ്ങൽ സ്വദേശി സുശീലനാണ് ദുബായിൽ മരിച്ചത്. ഡ്രൈവറായി ജോലി ചെയ്തു വരികയായിരുന്നു.

ആലപ്പുഴ പള്ളിപ്പുറം സ്വദേശി ഷാജി ചെല്ലപ്പൻ ഷാർജയിലാണ് മരിച്ചത്. അമ്പത്തിരണ്ടുകാരനായ ഷാജിയെ രണ്ടു ദിവസം മുമ്പാണ് കുവൈറ്റ് ആശുപത്രിയിൽ പ്രവേശിപ്പിച്ചത്. ഇതോടെ യു.എ.ഇയിൽ മരിച്ച മലയാളികളുടെ എണ്ണം 49 ആയി.

തൃശൂർ കുന്നംകുളം സ്വദേശി ബാലൻ ഭാസി സൗദി അറേബ്യയിലെ ദമാമിൽ മരിച്ചു. സൗദിയിൽ ഇതുവരെ 12 മലയാളികളാണ് മരിച്ചത്. ഇതോടെ ഗൾഫിൽ കൊവിഡ് ബാധിച്ച് മരിച്ച മലയാളികളുടെ എണ്ണം 69 ആയി.