പാലോട് : പെരിങ്ങമ്മല പന്നിയോട്ട് കടവിൽ ജനവാസ മേഖലയിലെത്തിയ കാട്ടാന ആദിവാസിയുടെ വീട് തകർത്തു. പന്നിയോട്ട് കടവ് സ്വദേശി
പുഷ്പാംഗദൻ കാണിയുടെ വീടാണ് കനത്തമഴ സമയത്ത് കാട്ടാന ചവിട്ടി തകർത്തത്. വീടിന്റെ ഒരു ഭാഗം പൂർണമായും ഇടിഞ്ഞു വീണു. വീട്ടുകാർ ബഹളം വെച്ചതിനെ തുടർന്ന് ആന പിൻവാങ്ങി. സമീപത്തുള്ള കൃഷി മേഖലകളും നശിപ്പിച്ചു. പാലോട് ഫോറസ്റ്റ് റേഞ്ച് ഓഫിസർ അജിത്കുമാറിന്റെ നേതൃത്വത്തിൽ കൃഷിസ്ഥലം സന്ദർശിച്ച് തെളിവെടുത്തു. നഷ്ടപരിഹാരം കിട്ടാൻ അടിയന്തര നടപടി സ്വീകരിക്കുമെന്നും കാട്ടാന ശല്യം രൂക്ഷമായ പന്നിയോട്ട് കടവ്,ഒരുപറകരിക്കകം, പേത്തലകരിക്കകം പ്രദേശങ്ങളെ സംരക്ഷിക്കാൻ വൈദ്യുതി വേലി നിർമിക്കാൻ നടപടി സ്വീകരിക്കുമെന്നും റേഞ്ച് ഓഫിസർ പറഞ്ഞു.