തിരുവനന്തപുരം: കൊവിഡ് പ്രതിരോധത്തിനായി പൊലീസിന്റെ പ്രവർത്തനം തിങ്കളാഴ്ച മുതൽ അടിമുടി മാറും. ഇതിനുള്ള സ്​റ്റാന്റേർഡ് ഓപ്പറേ​റ്റിംഗ് പ്രൊസീജർ സർക്കാർ അംഗീകരിച്ചു. രേഖകളുടെ പരിശോധന, കു​റ്റകൃത്യം നടന്ന സ്ഥലം പരിശോധിക്കൽ, പരാതിക്കാരോട് സംസാരിക്കൽ എന്നിവയിൽ നിയന്ത്രണമുണ്ടാവും. ഇനിയൊരു അറിയിപ്പുണ്ടാകുംവരെ വെളളിയാഴ്ച പരേഡ് ഒഴിവാക്കി. ഉദ്യോഗസ്ഥരുടെയും കുടുംബാംഗങ്ങളുടെയും ക്ഷേമം, ആരോഗ്യം എന്നിവ ഉറപ്പാക്കാൻ എ.ഡി.ജി.പിമാരായ ബി. സന്ധ്യ, എം.ആർ. അജിത്കുമാർ എന്നിവരെ ചുമതലപ്പെടുത്തി.

മറ്റു നിർദ്ദേശങ്ങൾ

 കൊവിഡ് പ്രതിരോധത്തിൽ പൊലീസ് സമൂഹത്തിന് മാതൃകയാകണം. വീഴ്ചയെങ്കിൽ നടപടി. മികവിന് ആദരം

 റോൾകാൾ, ഷിഫ്​റ്റ് മാ​റ്റം, പരേഡ്, ക്ലാസുകൾ എന്നിങ്ങനെ ഒത്തുകൂടുന്ന അവസരങ്ങൾ ഒഴിവാക്കണം

ഡ്യൂട്ടി കഴിഞ്ഞാൽ വീഡിയോ കാൾ, ഫോൺ, വയർലെസ് മുഖേന മേലുദ്യോഗസ്ഥനെ അറിയിച്ച് മടങ്ങാം

 സ്​റ്റേഷനുകളിൽ ഉദ്യോഗസ്ഥർ കൂട്ടംചേർന്ന് ഇരിക്കുന്നത് ഒഴിവാക്കണം

നിർദ്ദേശങ്ങൾ നൽകാൻ എസ്.എം.എസ്, വാട്സ് ആപ്പ് ഉപയോഗിക്കണം

 ഡ്യൂട്ടി കഴിഞ്ഞ് വീടുകളിലേക്ക് പോകണം. സുഹൃത്തുക്കളെയോ ബന്ധുക്കളെയോ സന്ദർശിക്കരുത്

ജോലി ചെയ്യുന്ന സ്ഥലവും സാഹചര്യവുമനുസരിച്ചുളള സുരക്ഷാ ഉപകരണങ്ങൾ ലഭ്യമാക്കണം

 ഉദ്യോഗസ്ഥർ ഭക്ഷണവും വെള്ളവും കരുതണം. വ്യായാമമുറകൾ, യോഗ എന്നിവ ശീലമാക്കണം

 എല്ലാ യൂണി​റ്റിലും വെൽഫെയർ ഓഫീസർമാർ സുരക്ഷാ ഉപകരണങ്ങളുടെ ലഭ്യത ഉറപ്പാക്കും

 ഹോമിയോ, ആയുർവേദ പ്രതിരോധ മരുന്നുകൾ ഉദ്യോഗസ്ഥർക്ക് ലഭ്യമാക്കണം