ചെന്നൈ: മഹാരാഷ്ട്രയും തമിഴ്‌നാടും ലോക്ക്ഡൗണ്‍ മേയ് 31 വരെ നീട്ടി. കൊവിഡ് പടരുന്നതിന്റെ പശ്ചാത്തലത്തിലാണ് തീരുമാനം. 37 ജില്ലകളിലുള്ള തമിഴ്നാട്ടിൽ 12 ജില്ലകൾ അതിതീവ്ര കേന്ദ്രങ്ങളാണ്. ഈ 12 ജില്ലകളിലും മൂന്നാംഘട്ടത്തിൽ എങ്ങനെ ആയിരുന്നുവോ ലോക്ക്ഡൗൺ നടപ്പാക്കിയിരുന്നത് അങ്ങനെ തന്നെ നടപ്പാക്കാനാണ് തീരുമാനം. മറ്റ് 25 ജില്ലകളിൽ ഇളവുകളോടെ ലോക്ക്ഡൗൺ നടപ്പാക്കും.സംസ്ഥാനത്ത് പൊതുഗതാഗതം ആരംഭിക്കേണ്ടെന്ന് തീരുമാനിച്ചിട്ടുണ്ട്. എന്നാൽ നഗര പ്രദേശങ്ങളിലേത് ഉൾപ്പെടെയുള്ള വ്യാപാരശാലകൾക്ക് അമ്പതുശതമാനം ജീവനക്കാരെ വച്ച് പ്രവർത്തിക്കാൻ ഇളവ് നൽകിയിട്ടുണ്ട്.

രോഗവ്യാപനം രൂക്ഷമാകുന്നതിന്റെ പശ്ചാത്തലത്തിലാണ് മഹാരാഷ്ട്രയും ലോക്ക്ഡൗൺ നീട്ടിയത്. ഇളവ് അനുവദിക്കുന്ന കാര്യത്തിൽ ഉത്തരവ് ഉടൻ ഇറങ്ങും.നിലവിൽ 30,000 പേർക്കാണ് മഹാരാഷ്ട്രയിൽ കൊവിഡ് ബാധിച്ചത്.