ഡാറ്റ്സൺ ഇന്ത്യ ഗോ, ഗോ-പ്ലസ് മോഡലുകൾ പുറത്തിറക്കി. സിവിടി സജ്ജീകരണത്തോടെയാണ് ഇരു മോഡലുകളും എത്തുന്നത്. പരമാവധി 77 പിഎസ് / 104 എൻഎം കരുത്തുള്ള 1.2 ലിറ്റർ പെട്രോൾ എഞ്ചിനാണ് പുതിയ ഡാറ്റ്സൺ ഗോ, ഗോ-പ്ലസ്, മോഡലുകൾക്കുള്ളത്. 5 സ്പീഡ് മാനുവൽ , സിവിടി ട്രാൻസ്മിഷനാണ് വാഹനത്തിന്റേത്.

പുതിയ ഗോ, ഗോ-പ്ലസ് അവതരിപ്പിച്ചതിനൊപ്പം പുതിയ ഫിനാൻഷ്യൽ പദ്ധതികളും ഡാറ്റ്സൺ വാഗ്ദാനം ചെയ്യുന്നു. 'ബൈ നൗ പേ ഇൻ 2021' പദ്ധതി പ്രകാരം കാർ വാങ്ങുന്നവർക്ക് 2021 മുതൽ ഇ.എം.ഐ അടച്ച് തുടങ്ങാവുന്നതാണ്. 100% ഫിനാൻസ് ഓപ്ഷൻ, ലോ ഇ.എം.ഐ ബെനഫിറ്റ്, ഇഎംഐ അഷ്വറൻസ് ബെന‌ിഫിറ്റ് എന്നിവ ഉൾപ്പെടുന്ന മറ്റ് സ്‌കീമുകളുമുണ്ട്.

അഞ്ച് സീറ്റുകളുള്ള പുതിയ ഡാറ്റ്സൺ ഗോ മാനുവൽ വേരിയന്റിന് 3,99,000 രൂപയും സിവിടിക്ക് 6,25,000 രൂപ മുതലുമാണ് വില ആരംഭിക്കുന്നത്. വിപണിയിൽ ഏറ്റവും താങ്ങാനാവുന്ന വിലയുള്ള സിവിടി മോഡലാണിത്. ഏഴ് സീറ്റുകളുള്ള ഡാറ്റ്സൺ ഗോ-പ്ലസ് മാനുവലിന് 4,19,990 രൂപയും സിവിടിക്ക് 6,69,990 രൂപയുമാണ് വില.

റൂബി റെഡ്, ബ്രോൺസ് ഗ്രേ, ആംബർ ഓറഞ്ച്, ക്രിസ്റ്റൽ സിൽവർ, വിവിഡ് ബ്ലൂ, ഓപൽ വൈറ്റ് എന്നീ ആറ് നിറങ്ങളിൽ വാഹനം ലഭ്യമാണ്. വാഹനത്തിന് രണ്ട് വർഷത്തെ സ്റ്റാൻഡേർഡ് വാറണ്ടിയുണ്ട്, ഇത് അഞ്ച് വർഷം വരെ നീട്ടാം.2 വർഷത്തേക്ക് സൗജന്യ റോഡ് സൈഡ് അസിസ്റ്റൻസ് സബ്സ്‌ക്രിപ്ഷനോടെയാണ് രണ്ട് കാറുകളും എത്തുന്നത്.

ജാപ്പനീസ് സാങ്കേതികവിദ്യ ഉപയോഗിച്ച് നിർമ്മിച്ച രണ്ട് കാറുകളും ബിഎസ് 6 മാനദണ്ഡങ്ങൾ അനുസരിച്ചുള്ളതാണ്, മാത്രമല്ല ഇന്ത്യയിൽ ഏറ്റവും താങ്ങാനാവുന്ന വിലയിൽ സിവിടി ഓപ്ഷനുകൾ ഞങ്ങൾ വാഗ്ദാനം ചെയ്യുന്നു. ഈ സമയങ്ങളിൽ ഉപയോക്താക്കളെ പിന്തുണക്കുന്നതിന് നൂതന ധനകാര്യ സ്‌കീമുകളും ഞങ്ങൾ വാഗ്ദാനം ചെയ്യുന്നു.' നിസ്സാൻ മോട്ടോർ ഇന്ത്യ മാനേജിംഗ് ഡയറക്ടർ രാകേഷ് ശ്രീവാസ്തവ പറഞ്ഞു.

രണ്ട് മോഡലുകളിലും മിനുസമാർന്ന ഡയമണ്ട് കട്ട് ആർ 14 അലോയ് വീലുകളാണ് ഘടിപ്പിച്ചിരിക്കുന്നത്. സ്റ്റൈലിഷ് എൽഇഡി ഡിആർഎല്ലുകൾ (ഡേടൈം റണ്ണിംഗ് ലാമ്പുകൾ), 180 മില്ലിമീറ്റർ ഗ്രൗണ്ട് ക്ലിയറന്‍സ് എന്നിവയാണ് മറ്റ് പ്രത്യേകതകൾ. ക്ഷീണം അനുഭവപ്പെടാത്ത ആന്റി-ഫാറ്റിഗ് സീറ്റുകളാണ് സജ്ജീകരിച്ചിരിക്കുന്നത്.എഎംടി ട്രാന്‍സ്മിഷൻ മോഡലുകളേക്കാൾ നിരവധി ഗുണങ്ങളാണ് ഡാറ്റ്സൺ ഗോ, ഗോ-പ്ലസ് സിവിടി മോഡലുകൾ വാഗ്ദാനം ചെയ്യുന്നത്. സുഗമമായ ഗിയർ മാറ്റം; മികച്ച ഹിൽ ഡ്രൈവിംഗ് അനുഭവം; കുറഞ്ഞ എഞ്ചിന്‍ ശബ്ദം എന്നിവയാണ് പ്രത്യേകതകൾ.

വെഹിക്കിൾ ഡൈനാമിക് കൺട്രോൾ, ഡ്യുവൽ ഫ്രണ്ട് എയർബാഗുകൾ, എബിഎസ്, ഇബിഡി, ബ്രേക്ക് അസിസ്റ്റ്, റിവേഴ്‌സ് പാർക്കിംഗ് അസിസ്റ്റ് അടക്കമുള്ള മികച്ച സുരക്ഷാ സവിശേഷതകളാണ് രണ്ട് കാറുകളിലും ഉള്ളത്.