വെള്ളറട: ശക്തമായ കാറ്റിൽ മലയോരത്തെ നൂറുകണക്കിന് റബർ മരങ്ങളും വാഴകളും മറ്റു വൃക്ഷങ്ങളും കടപുഴകി വീണു. പലസ്ഥലങ്ങളിലും വൈദ്യുതി ബന്ധവും തകരാറിലായി. നഷ്ടങ്ങളുടെ കണക്കുകൾ ശേഖരിച്ചു വരുന്നതേയുള്ളു. വെള്ളറട അമ്പൂരി കുന്നത്തുകാൽ,​ ആര്യങ്കോട്,​ ഒറ്റശേഖരമംഗലം പഞ്ചായത്തുകളിലാണ് കൃഷി നാശമുള്ളത്. വീടുകളുടെ മുകളിൽ വൃക്ഷങ്ങൾ കടപുഴകി വീണ് കേടുപാടുകൾ സംഭവിച്ചു. തമിഴ്നാട് അതിർത്തിയായ നെട്ട,​ ശങ്കരൻ കടവ്,​ വൈകുണ്ഡം തുടങ്ങിയ സ്ഥലങ്ങളിൽ തോട്ടം മേഖലയിൽ വ്യാപകമായി റബർ മരങ്ങൾ കടപുഴകി വീണു. ശക്തമായ കാറ്റ് ഇപ്പോഴും തുടരുകയാണ്. പാട്ടത്തിന് സ്ഥലമെടുത്ത് വാഴകൃഷിയിറക്കിയ കർഷകരുടെ കുലയ്ക്കാറായ വാഴകളാണ് കാറ്റിൽ ഒടിഞ്ഞുവീണത്. ഇതുകാരണം കർഷകർക്ക് കാര്യമായ നഷ്ടം സംഭവിച്ചിട്ടുണ്ട്.