മുംബയ്: സ്വർണവില പവന് 160 രൂപ കുറഞ്ഞ് 34,520 രൂപ ആയി. ഗ്രാമിന് 4315 രൂപയാണ് വില. കഴിഞ്ഞ ദിവസത്തെ 34,680 രൂപയില്‍നിന്ന് 160 രൂപയാണ് പവൻ വിലയില്‍ കുറവുണ്ടായത്. മേയ് 18ന് പവന് വില റെക്കോഡ് നിലവാരമായ 35,040 രൂപയിലെത്തിയിരുന്നു. അടുത്ത ദിവസംതന്നെ 520രൂപയാണ് കുറഞ്ഞത്.
മൂന്നുദിവസമായി വർദ്ധിച്ചുകൊണ്ടിരുന്ന ആഗോള വിപണിയിലെ വിലയില്‍ വ്യാഴാഴ്ച ഇടിവുണ്ടായി. സ്‌പോട്ട് ഗോള്‍ഡ് വില ഔണ്‍സിന് 1,745.32 ഡോളറിലെത്തി. കൊവിഡ് വ്യാപനം നിയന്ത്രണത്തിലാകുകയും അമേരിക്ക-ചൈന തര്‍ക്കത്തിന് അയവുവരികയും ചെയ്താല്‍ മാത്രമെ സ്വര്‍ണവില കുറയുകയുള്ളൂ എന്നാണ് വിലയിരുത്തല്‍.
നിക്ഷേപകര്‍ വ്യാപകമായി വിറ്റ് ലാഭമെടുത്തതുകൊണ്ടാണ് വിലയില്‍ താത്ക്കാലികമായി കുറവുണ്ടായത്. അതേസമയം കേരളത്തില്‍ ലോക്ക്ഡൗണിന് ഇളവ് നല്‍കിയതോടെ ജ്വല്ലറികള്‍ ഇന്നലെ മുതൽ പ്രവർത്തിച്ച് തുടങ്ങിയിരുന്നു.