തിരുവനന്തപുരം :കൊവിഡ് പ്രതിരോധത്തിന്റെ ഭാഗമായുള്ള ബ്രേക്ക് ദ ചെയിൻ കാമ്പെയിൻ കൂടുതൽ ജനകീയമാക്കാൻ എല്ലാ നഗരങ്ങളിലും കാർട്ടൂൺ മതിൽ ഒരുങ്ങുന്നു. ആദ്യഘട്ടമായി സാമൂഹ്യനീതി വകുപ്പ്, സാമൂഹ്യ സുരക്ഷാമിഷൻ, വനിതാ ശിശുവികസന വകുപ്പ്, കാർട്ടൂൺ അക്കാഡമി എന്നിവ സംയുക്തമായി തിരുവനന്തപുരം വെള്ളയമ്പലം മാനവീയം വീഥിയിൽ തീർത്ത കാർട്ടൂൺ മതിൽ മന്ത്രി കെ.കെ.ശൈലജ ഉദ്ഘാടനം ചെയ്തു. സോപ്പ്, മാസ്‌ക്, സാമൂഹ്യ അകലം, പൊതുനിരത്തിൽ തുപ്പുന്നതിനെതിരെ തുപ്പല്ലേ തോറ്റു പോകും തുടങ്ങിയ ബോധവത്കരണ സന്ദേശങ്ങൾ ഉൾക്കൊള്ളുന്നതാണ് കാർട്ടൂൺ മതിൽ. ബ്രേക്ക് ദ ചെയിൻ കാമ്പെയിൻ കൂടുതൽ വിപുലമാക്കി വൈറസ് വ്യാപനത്തിനെതിരെ പൊതുജനങ്ങളിൽ നല്ല ബോധവത്കരണം നടത്താൻ കഴിയുമെന്ന് മന്ത്രി പറഞ്ഞു. മേയർ കെ.ശ്രീകുമാർ, സാമൂഹ്യനീതി വകുപ്പ് സെക്രട്ടറി ബിജു പ്രഭാകർ, കാർട്ടൂൺ അക്കാഡമി ചെയർമാൻ ഉണ്ണികൃഷ്ണൻ, സാമൂഹ്യ സുരക്ഷാ മിഷൻ എക്‌സി.ഡയറക്ടർ ഡോ.മുഹമ്മദ് അഷീൽ എന്നിവർ പരിപാടിയിൽ പങ്കെടുത്തു. കാർട്ടൂണിസ്റ്റുകളായ കൃഷ്ണകുമാർ വട്ടപ്പറമ്പിൽ, ഭരത് മനോജ്, മനോജ് മത്തശേരി, സിനിലാൽ ഒ.ശങ്കർ, ശാക്കിർ എറവക്കാട്, അനിൽ വേഗ, അബ്ബ വാഴൂർ, പ്രസന്നൻ ആനിക്കാട്, ഇ.പി.പീറ്റർ, വി.ആർ.സത്യദേവ്, പ്രതാപൻ പുളിമാത്ത്, സ്വാതി ജയകുമാർ, എ.സതീഷ്, കെ.ഉണ്ണികൃഷ്ണൻ, അനൂപ് രാധാകൃഷ്ണൻ, രതീഷ് രവി, ഡാവിഞ്ചി സുരേഷ്, സുഭാഷ് കല്ലൂർ, സനീഷ് ദിവാകരൻ, സജീവ് ശൂരനാട്, ഷാജി സീതത്തോട്, സുരേഷ് ഹരിപ്പാട്, മധൂസ്, ടി.എസ്. സന്തോഷ്, പ്രിയരഞ്ജിനി, ദിൻരാജ്, മോഹൻദാസ്, ബൈജു പൗലോസ്, കലേഷ് പൊന്നപ്പൻ, ശിവദാസ് വാസു, എം.എസ്.രഞ്ജിത്ത് എന്നിവർ കാർട്ടൂൺ മതിലിൽ പങ്കാളികളായി.