കാട്ടാക്കട: കുളത്തുമ്മൽ ഗവ. ഹയർസെക്കൻഡറി സ്കൂളിന്റെ പുതിയ ബഹുനില കെട്ടിട നിർമ്മാണത്തിന് സാങ്കേതികാനുമതി ലഭ്യമാക്കി ടെണ്ടർ നടപടികളിലേക്ക് കടന്നതായി ഐ.ബി. സതീഷ് എം.എൽ.എ അറിയിച്ചു. നബാർഡ് ആർ.ഐ.ഡി.എഫ് സ്‌കീമിൽ ഉൾപ്പെടുത്തി 6.6 കോടി രൂപ ചെലവഴിച്ചാണ് കെട്ടിടം നിർമ്മിക്കുന്നത്. 1930ചതുരശ്ര മീറ്റർ വിസ്തീർണത്തിൽ നാല് നിലയുള്ള ആർ.സി.സി ഫ്രെയിംഡ് സ്‌ട്രക്ച്ചർ ആയിട്ടാണ് കെട്ടിടം രൂപകല്പന ചെയ്യുക. ഈ കെട്ടിടത്തിൽ 11 ക്ലാസ്സ്‌ റൂം, 5 ലാബ് റൂം, പ്രിൻസിപ്പൽ റൂം, ഓഫീസ് റൂം, സ്റ്റാഫ് റൂം, എല്ലാ നിലയിലും ആൺകുട്ടികൾക്കും പെൺകുട്ടികൾക്കും അംഗപരിമിതർക്കും പ്രത്യേക ടോയ്‌ലെറ്റുകൾ എന്നിവ ഉണ്ടാകും. പി.ഡബ്ലിയു.ഡി തയ്യാറാക്കിയ ആർകിടെക്ചർ ഡ്രോയിംഗും സ്‌ട്രക്ച്ചറൽ ഡിസൈനും പ്രകാരം ഇലക്ട്രിക്കൽ വർക്ക് ഉൾപ്പടെ 6.6 കോടി രൂപയുടെ എസ്റ്റിമേറ്റാണ് തയ്യാറാക്കിയിരിക്കുന്നത്. ഇതിന് പുറമേ സ്കൂളിന്റെ അടിസ്ഥാന സൗകര്യം മെച്ചപ്പെടുത്തുന്നതിന് കിഫ്ബി വഴി ഒരു കോടി രൂപയുടെ നിർമ്മാണ പ്രവർത്തനങ്ങൾക്കുള്ള അനുമതിയും ഹയർ സെക്കൻഡറി വിഭാഗത്തിലെ ലാബ് സൗകര്യം മെച്ചപ്പെടുത്തുന്നതിന് സംസ്ഥാന സർക്കാരിന്റെ ഒരു കോടി രൂപയുടെ പ്രവർത്തികൾക്കുള്ള അനുമതിയും ലഭ്യമാക്കിയിട്ടുണ്ട്. ടെണ്ടർ നടപടികൾ പൂർത്തിയാക്കി നിർമ്മാണ പ്രവർത്തികൾ ഉടൻ ആരംഭിക്കുമെന്ന് എം.എൽ.എ അറിയിച്ചു.