തിരുവനന്തപുരം: സ്കൂൾ വിദ്യാർത്ഥികൾക്കുവേണ്ടിയുള്ള ഓൺലൈൻ ക്ലാസുകൾ സംപ്രേക്ഷണം ചെയ്യാൻ ഒരുക്കങ്ങൾ പൂർത്തിയായെന്ന് വിക്ടേഴ്സ് ചാനൽ . രാവിലെ എട്ട് മുതൽ വൈകിട്ട് അഞ്ച് വരെയായിരിക്കും സംപ്രേക്ഷണം. കാര്യങ്ങൾ ഈ നിലയിൽ മുന്നോട്ടുപോവുകയാണെങ്കിൽ ഒന്നര മാസം വരെയേ ഓൺലൈൻ സംവിധാനം ഉപയോഗിക്കേണ്ടി വരൂ എന്നാണ് വിദ്യാഭ്യാസ വകുപ്പിന്റെ ഇപ്പോഴത്തെ വിലയിരുത്തൽ.
എസ്‍.സി.ഇ.ആർ.ടിയിലെ മികച്ച അദ്ധ്യാപകർ നയിക്കുന്ന ക്ലാസുകളാണ് വിക്ടേഴ്സ് ചാനൽ വഴി സംപ്രേക്ഷണം ചെയ്യുക. സംപ്രേക്ഷണം ചെയ്യുന്ന ക്ലാസുകളുടെ ഷൂട്ടിംഗ് ഇപ്പോൾ പുരോഗമിക്കുകയാണ്. അര മണിക്കൂർ ദൈർഘ്യമുളള ക്ലാസുകൾ ആയിരിക്കും നൽകുക. ടൈംടേബിളുകളാക്കി നൽകുകയാണ് അടുത്തഘട്ടം. രണ്ട് ദിവസത്തിനുളളിൽ ടൈംടേബിൾ പുറത്തിറക്കാനാവും എന്നാണ് കരുതുന്നത്.
കുട്ടികൾക്ക് അദ്ധ്യാപകരുമായി സംവദിക്കാൻ ചാനൽ വഴിയുളള ക്ലാസുകൾക്ക് അവസരമില്ല എന്നത് പ്രധാന പോരായ്മയായി ചിലർചൂണ്ടിക്കാണിക്കുന്നുണ്ട്. എന്നാൽ ഓൺലൈൻ ക്ലാസുകളെ സാധാരണ ക്ലാസുകളുമായി താരതമ്യം ചെയ്യേണ്ടതില്ലെന്നാണ് വിദ്യാഭ്യാസവകുപ്പ് വ്യക്തമാക്കുന്നത്.