തിരുവനന്തപുരം : അഞ്ചലിൽ ഭർത്താവ് യുവതിയെ പാമ്പ് കടിപ്പിച്ച് കൊലപ്പടുത്തിയ സംഭവത്തിൽ കൊലപാതകം നടത്താനുപയോഗിച്ച മൂർഖൻ പാമ്പിനെ ഇന്ന് പോസ്റ്റുമോർട്ടം നടത്തും.ഉത്രയുടെ മരണശേഷം കിടപ്പുമുറിയിലെ കട്ടിലിനടിയിൽ നിന്ന് കണ്ടെത്തി കൊന്നുകുഴിച്ചൂമൂടിയ പാമ്പിനെയാണ് ഫോറസ്റ്ര് ഉദ്യോഗസ്ഥരുടെയും വെറ്റിനറി സർജന്റെയും നേതൃത്വത്തിൽ രാവിലെ 11 മണിയോടെ പോസ്റ്റുമോർട്ടം നടത്തുക.

മൂർഖൻ പാമ്പിനെ ഉപയോഗിച്ചാണ് ഉത്രയെ കൊലപ്പെടുത്തിയതെന്ന പ്രതിസൂരജിന്റെ മൊഴി വാസ്തവമാണോയെന്ന് ശാസ്ത്രീയ പരിശോധനയിലൂടെ ഉറപ്പാക്കുകയാണ് പോസ്റ്റുമോ‌ർട്ടത്തിന്റെ ലക്ഷ്യം. പോസ്റ്റുമോ‌ർട്ടം നടത്തുന്ന വെറ്റിനറി സർജനും ഫോറസ്റ്റ് ഉദ്യോഗസ്ഥരും കേസിലെ സാക്ഷികളാകും. പാമ്പിന്റെ ഇനം ഉറപ്പാക്കുന്നതിനൊപ്പം ഉത്തരയെ കടിച്ച് കൊലപ്പെടുത്തിയ പാമ്പിന്റെ പ്രായം, പല്ലിന്റെ നീളം, വിഷത്തിന്റെ കാഠിന്യം, പാമ്പിന്റെ പല്ലിൽ ഉത്രയെ കടിച്ചുവെന്നതിന്റെ തെളിവായി അതിന്റെ ശിരസോ പല്ലുകളോ ഉത്തരയുടെ രക്തത്തിന്റെ അംശം അടങ്ങിയിട്ടുണ്ടോയെന്നറിയാൻ ഫോറൻസിക് ലാബിലേക്ക് ശാസ്ത്രീയ പരിശോധനയ്ക്കായി അയക്കും. പോസ്റ്റുമോർട്ടം നടപടികൾക്ക് മേൽനോട്ടം വഹിക്കാനും അതിന്റെ മഹസർ റിപ്പോർട്ട് തയ്യാറാക്കാനും കേസ് അന്വേഷിക്കുന്ന കൊല്ലം റൂറൽ ജില്ലാ ക്രൈംബ്രാഞ്ച് ഡിവൈ.എസ് പി അശോകന്റെ നേതൃത്വത്തിലുള്ള പൊലീസ് ഉദ്യോഗസ്ഥരും ഉത്രയുടെ വീട്ടിലെത്തും.