മോസ്കോ : പറന്നുയരുന്നതിനിടെ റഷ്യയിൽ മിലിട്ടറി ഹെലികോപ്ടർ തകർന്ന് വീണ് നാല് മരണം. കിഴക്കൻ മേഖലയായ ചുകോട്കയിലെ എയർപോർട്ടിലാണ് അപകടം. മിലിട്ടറിയുടെ എം.ഐ - 8 വിഭാഗത്തിൽപ്പെടുന്ന ഹെലികോപ്ടറാണ് തകർന്ന് വീണത്. സാങ്കേതിക തകരാറാണ് അപകടത്തിനിടയാക്കിയതെന്ന് ആഭ്യന്തരമന്ത്രാലയം പറഞ്ഞു.

ഒരാഴ്ചയ്ക്കിടെ ഇത് രണ്ടാം തവണയാണ് മിലിട്ടറിയുടെ എം.ഐ - 8 ഹെലികോപ്ടർ തകർന്നുവീഴുന്നത്. മേയ് 19ന് മോസ്കോയിൽ നിന്നും 90 കിലോമീറ്റർ അകലെയുള്ള ക്ലിൻ നഗരത്തിൽ എം.ഐ - 8 ഹെലികോപ്ടർ തകർന്ന് മൂന്ന് പേർ മരിച്ചിരുന്നു. ആ അപകടവും സാങ്കേതിക തകരാറ് മൂലമാണെന്നായിരുന്നു വിശദീകരണം.

സോവിയറ്റ് യൂണിയൻ രൂപകല്പ ചെയ്ത മീഡിയം ട്വിൻ ടർബൈനോട് കൂടിയ മൾട്ടിപർപ്പസ് ഹെലികോപ്ടറാണ് എം.ഐ - 8. റഷ്യയാണ് ഇപ്പോൾ എം.ഐ - 8 ഉത്പാദിപ്പിക്കുന്നത്. റഷ്യയിൽ സായുധസേന സാധാരണയായി ഉപയോഗിച്ച് വരുന്ന ഹെലികോപ്ടറാണ് എം.ഐ - 8.