വെഞ്ഞാറമൂട് : സ്വത്ത് തർക്കത്തെ തുടർന്ന് പിതാവിനെ മകൻ വെടിവച്ചു. വെഞ്ഞാറമൂട് കോട്ടുകുന്നം ദിലീപ് ഭവനിൽ സുകുമാരപിള്ളയ്ക്കാണ് (65) വെടിയേറ്റത്. കഴിഞ്ഞ ദിവസം രാവിലെ 10.30നാണ് സംഭവം. സംഭവത്തെ കുറിച്ച് പൊലീസ് പറയുന്നതിങ്ങനെ: സുകുമാരപിള്ളയും ഭാര്യയും ഇളയ മകനോടൊപ്പം കോട്ടുകുന്നത്താണ് താമസം. മറ്റൊരു വീട്ടിലാണ് മൂത്ത മകൻ ദിലീപ് താമസിക്കുന്നത്. കഴിഞ്ഞ ദിവസം രാവിലെ ഇയാൾ സുകുമാരപിള്ളയുടെ വീട്ടിൽ എത്തുകയും കൃഷിയിടത്തിൽ പണിയിലേർപ്പിട്ടിരുന്ന പിതാവിനു നേരെ എയർഗൺ ഉപയോഗിച്ച് തുരുതുരെ വെടി ഉതിർക്കുകയുമായിരുന്നു. വെടിയേറ്റ സുകുമാരപിള്ളയെ കന്യാകുളങ്ങര കമ്യൂണിറ്റി ഹെൽത്ത് സെന്ററിലും തുടർന്ന് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. സംഭവ ശേഷം ഓടി രക്ഷപ്പെട്ട ദിലീപിനു വേണ്ടി പൊലീസ് തെരച്ചിൽ ആരംഭിച്ചു. സ്വത്ത് തർക്കമാണ് കൃത്യത്തിന് പിന്നിലെന്ന് പൊലീസ് പറയുന്നു. അബ്കാരി കേസ്, വന്യമൃഗങ്ങളെ തോക്ക് ഉപയോഗിച്ച് വേട്ടയാടൽ തുടങ്ങി നിരവധി കേസുകളിലെ പ്രതിയാണ് ദിലീപ്.