ന്യൂഡൽഹി: ഡൽഹിയിൽ കൊവിഡ് ബാധിച്ചവരുടെ എണ്ണം കുത്തനെ ഉയരുന്നു. തുടർച്ചയായ രണ്ടാം ദിവസവും ആയിരത്തിലേറെ കേസുകളാണ് സംസ്ഥാനത്ത് റിപ്പോർട്ട് ചെയ്തത്. കഴിഞ്ഞ 24 മണിക്കൂറിനിടെ 1106 പേ‍ർക്ക് രോഗം ബാധിച്ചു. ഒരു ദിവസം റിപ്പോ‍ർട്ട് ചെയ്‍ത ഏറ്റവും ഉയർന്ന നിരക്കാണിത്. ഇതോടെ ആകെ രോഗബാധിതർ 17,386 ആയി. മരണ സംഖ്യ 398 ആയി ഉയര്‍ന്നു.

പൊതുജനങ്ങൾ ആശങ്കപ്പെടേണ്ടതില്ലെന്നും രോഗമുക്തി 50 ശതമാനത്തിലെത്തിയത് നല്ല സൂചനയാണെന്നും ഉപമുഖ്യമന്ത്രി മനീഷ് സിസോദിയ പറഞ്ഞു. ഇതുവരെ 7846 പേർക്കാണ് രോഗം ഭേദമായത്. രോഗലക്ഷണങ്ങൾ ഇല്ലാത്തവർ ആശുപത്രിയിൽ പോകേണ്ടതില്ല. എൺപത് ശതമാനം ആളുകൾക്കും വീടുകളിൽ നിരീക്ഷണത്തിൽ ഇരുന്ന് തന്നെ ഭേദമാകുന്നുണ്ടെന്നും സിസോദിയ പറഞ്ഞു.